Maite Azkoaga: "Lortutakoari aurrerago garrantzia gehiago emango diogula uste dut"
Realeko belar hockey taldea Kopako txapeldun ordea izan da, Club de Camporen aurka finala galdu ostean
Ohorezko Mailako Ligan bezalaxe, bigarren postuan geratu da Reala asteburuan jokatutako Kopan. Club de Camporen aurka jokatu zuen finala talde txuri-urdinak, eta garaipena esku eskura izan zuen arren, penaltietan txapeldun izateko aukera galdu zuen. Realeko kapitaina da Maite Azkoaga (Aiete, 1983), eta bere ahotik asteburuan bizitakoaren berri jaso du IRUTXULOKO HITZAk.
Lehen partidan, Atletic Terrasari 4-1 irabazi zion Realak; hurrengoan, Poloren aurka 1-1 berdindu zuen, baina penalti estrocketan irabaztea lortu zuen. «Lehen partidan zertxobait kostatu zitzaigun gure jokoa egitea, baina irabazi egin genuen. Gero, finalerdietan, oso partida borobila egin genuen, baina berdinketarekin, strocketara iritsi ginen», azaldu du Azkoagak. Hala, finalerako txartela lortu zuten, Madrilgo Club de Camporen aurka. «Finalean, aurreratu egin ginen, 1-0, eta aukera bat baino gehiago izan genituen arren, pena izan zen ez genuela bigarren gola sartzea lortu. Berdinketaren gola sartu ziguten eta luzapenean ez ginen bigarren gola sartzeko gai izan». Horrela penalti strocketara iritsi ziren, eta ez zuten zorterik izan. Hala ere, egindako lanarekin harro egoteko moduan daudela uste du kapitainak. «Club de Camporen aurka jokatu ditugun partidetatik, garaipena gertuen izan duguna da. Partida guk eraman genuen». Lehenago ere Club de Camporen aurka final bat baino gehiago galduak ditu Realak. «Beste urtebetez berdina gertatu zaigu. Argi dago oso talde ona dutela, baina uste dut momentu honetan beraien maila berdinean gaudela, eta horregatik izan dugu penarik handiena. Lanean jarraitu beharko dugu».
Azken batean, igandea egun gogorra izan zela onartu du Azkoagak. «Larunbatean asko poztu ginen finalean sartu ginelako, baina igandean oso triste geratu ginen. Lortutakoari aurrerago garrantzia gehiago emango diogula uste dut».
Europako Txapelketara
Bai finalean eta bai gainontzeko partidetan ere, zalegoaren babesa izan zuen Realak. «Asteburu guztian zale asko izan ditugu ondoan, senitartekoak eta lagun asko bereziki. Oso giro ona izan dugu eta txapelketa guztian gehien entzun den zalegoa gurea izan da».
Beraz, zaleez kexatzerik ez duen bezala, lortutako emaitzekin ere pozik egoteko moduan da Reala. Izan ere, egindako lan finari esker, datorren urtean berriro ere Europako Txapelketan izango da Donostiako taldea.
Argi geratu da, gainera, entrenatzaile aldaketak ez duela Realaren joko onean eragin txarrik izan. Izan ere, Carlos Castañok talde txuri-urdina entrenatzeari utzi dio, sei denboraldi eta gero. Orain arte bigarrren entrenatzailea izandako Ion Kamiok hartu du Castañoren tokia, Peio Azkoagaren laguntzarekin. «Ion gurekin ibili da denboraldi guztian, eta Peio ere Europako Txapelketa jokatu genuenetik dabil laguntzen. Euren ukitua eman diote taldeari azken hiru asteetan, baina jokatzeko era ez da asko aldatu».
Bukatu dira 2011-2012 denboraldiko partida ofizial guztiak Realarentzat. Oraindik ez dakite datorren urtean zein izango duten entrenatzaile, baina maila ona ematen jarraitzeko moduan daude.
Realeko kideak lortutako dominekin. (Argazkia: Reala)
