Alde Zaharra Kirol Elkartea, klub txiki baten handitasuna
Alde Zaharra Kirol Elkarteko Saskibaloi atalak 20 urte beteko ditu irailean. Urteurren biribilaren ospakizuna, ordea, larunbatean egingo dute. Klubeko jokalari ohiak eta egungoak nor baino nor ariko dira Trinitate plazan.
“Jaiarekin eskerrak eman nahi dizkiegu gure aldeko apustua egin dutenei. Izena, etiketak… kontuan izan gabe, gure klubera etortzea erabaki zutenei. Bizirik gaudela aldarrikatuko dugu”, baieztatu du Alde Zaharra Saskibaloi Taldeko sortzaileetako bat den Elena Martinezek (Antigua, 1974). Pilotarengatik ezaguna den kirol elkarteak 1992an abian jarri zuen Saskibaloi atala. Orduan, talde bakarra zuen; egun, 20 urte geroago, berriz, lau dira. Ahaleginez betetako bi hamarkadak kluba bizirik mantendu duten kideekin ospatzea erabaki dute. Horretarako, jokalari ohiak egungoen aurka lehiatuko dira. Emakumezkoen partida 16:30ean hasiko da, eta jarraian, gizonezkoena egingo dute. Ondoren, hirukoen lehiaketa izango da, eta azkenik, askaria. Parte hartu nahi duten jokalari ohiek nomemandesunmail@vodafone.es helbidera idatzi behar dute.
Kirol jaia Trinitate plazan egingo dute, hasi ziren tokian. Martinez taldean izena eman zuen lehen jokalarietako bat izan zen. “Elizaran ikastetxetik gentozen. Zortzi bat neska ginen. Eskola kirola egiteko garaia amaitzean, Alde Zaharrako Josu Sainzek bertan parte hartu eta saskibaloi atala sortzea proposatu zigun”, gogoratu du antiguatarrak. Plazan jokatzen zuten, eta denetarik pasatu zutela dio jokalari ohiak. “Euripean, blai eginda… jokatzen genuen. Joan egin behar izan genuen, lixibaz betetako globoak eta bestelakoak botatzen zizkigutelako. Gero faltan bota gintuzten, plaza garbi mantentzen baikenuen”.
Entrenatzeko ezintasunaz gain, joateko beste arrazoi garrantzitsu bat ere bazuten: Trinitate plazak ez ditu lehiatzeko baldintzak betetzen. Karmelo Balda frontoian denboraldi bakarra egin ondoren, Altzako kiroldegian jokatzen hasi ziren. Dena den, Parte Zaharrera itzultzeko itxaropena ez dute galdu, ia ezinezkoa dela jakin arren. “Gune turistikoa denez, ia pentsaezina da hemen kiroldegia egitea. Hala ere, beti eskatuko dugu. Egunen batean egiten badute, itzuliko gara”.
Ahalegin bateratua
Tokia baino, ordea, jokalari berriak lortzea da Alde Zaharraren oztopo nagusia. “Donostian gurea bezalako klub txiki bat mantentzea zaila da. Lau klub indartsu daude hirian, eta guk lau talde besterik ez ditugu”. Gutxika hazten joan dira, baina oraindik ere kosta egiten zaie jendea erakartzea. “Jokalariak ez dira guregana etortzen. Borrokatu egin behar dugu, ateak jo. Ezin ditugu hautatu, etortzen direnak ongietorriak dira”. Harrobirik ez dutenez, lagungarri izango zaie aurten Easo Saskibaloi Taldearekin sinatu duten hitzarmena. Izan ere, honi esker, hango neskak Alde Zaharrara joango dira.
Zailtasunak zailtasun, Gipuzkoako txapeldun izan dira birritan eta maila garrantzitsuetan lau talde izatea lortu dute: Emakumezkoen Bigarren Mailan eta Gipuzkoako Ligan bana, eta Gizonezkoen Euskadiko Ligan eta Gipuzkoako Ligako Bigarren Mailan beste biak.
Jokalarien ahaleginaz gain, egunero klubaren alde egiten dutenen lanak iraunarazi ditu urteotan: Jose Mari Huegun presidentea, Mari Jose Quevedo idazkaria, Iñaki Ugarte zuzendari teknikoa, pilota ataleko Iñaki Fernando eta Karlos Etxabe, eta diruzaina den Martinez bera. “Seiok defendatzen dugu kluba”. Alde Zaharra ezagutzera eman eta dirua lortzea da hauen zeregin nagusia. Kirol Patronatuaren diru laguntzaz eta 33 babesleenaz gain, Aste Nagusian txosna jarriz, kamisetak, txartelak… salduz biltzen dute sosa.
Nahiz eta etorkizunari begira egiteko asko izan, antiguatarra harro dago orain arte egindakoaz: “Klase gutxiko klub bihurriaren etiketa kendu, eta gainontzekoek errespetatzea lortu dugu”.
Emakumezkoen Bigarren Mailan jokatzen duen Alde Zaharrako taldea, Iñaki Ugarte entrenatzailearekin. (Argazkia: Alde Zaharra K. E.)
