'(Ko) Garapenerantz urratsez urrats' gida aurkeztuko dute arratsaldean, Asis Zentroan
Garapen agenteei gogoetarako laguntza praktikoa eskaini nahi die.
Mariaren Lagundia Nazioarteko Solidaritzarako Fundazioak (Ko) Garapenerantz urratsez urrats, berdintasunaren bidetik gida aurkeztuko du, arratsaldean. Amaia Unzueta, Helena Martinez eta Cony Carranza migrazio, genero eta garapen adituek osatu dute, eta Gipuzkoako Foru Aldundiaren laguntzarekin argitaratu da. Genero ikuspegia aintzat hartuta migrazioei eta garapenari buruz gogoeta egiteko tresna da. Laguntza praktikoa eskaintzen die garapenean inplikatutako agenteei; bereziki etorkinen erakundeei, proiektu zehatzak abian jarri aurretik hausnarketa egiteko erabil dezaten. Egileen ustez, gogoeta burutzean, genero harremanek migrazio prozesuetan duten eragina nahiz migrazioak eta garapenak duten lotura kontuan hartzea ezinbestekoa da.
Aurkezpen ekitaldia irekia da eta Asis zentroan (Kaputxinoen eliza) egingo dute, 19:30ean.
