Pintxo solidarioarekin ospatuko du Valles tabernak 70 urteen muga

2012/06/20

Edari eta babarrun berri platerkadatxo bana salduko dute 3 eurotan. Dirua Intermon Oxfami emango diote

Ezkerretik eskuinera: Antxon Valles, Intermon Oxfam-eko Nerea Basterra eta Blas Valles zazpi hamarkaden oroigarria den ontziarekin. (Argazkia: Maitane Aldanondo)

Erdialdeko Valles tabernak 70 urte beteko ditu aurten. Urteurrenak data zehatzik ez duenez, ostiralean eta larunbatean ospatzea erabaki dute. Ateak ireki zituenetik 65 urte igaro zirenean, 3.000 gilda baino gehiago banatu zituzten bezeroen artean. Oraingoan ere, zerbait berezia egin nahi zuten; baina bezeroak eta, oro har, donostiarrak kontuan hartzeaz gain, behar gehien dutenen alde egiteko baliatu nahi dute urtemuga. Horregatik, Intemon Oxfamen aldeko pintxo solidarioa egingo dute, larunbatean.

Tabernako arduradun Antxon eta Blas Vallesek Intermon Oxfameko Nerea Basterrak ekimenaren xehetasunak azaldu zituzten atzo. Edari bat eta babarrun berri platerkadatxo bat 3 eurotan salduko dute. Halako mila saltzea aurreikusi arren, Antxon Vallesek 2.000 izatea espero du. Lehen 700 erosleei oroigarri gisa egin duten ontzia emango diete oparitan. Horietako bat izan edo ez, pintxo solidarioa erosten duten guztiek hainbat zozketetarako txartela jasoko dute. Errege katolikoen kaleko terrazan egingo dute, 12:30etik 15:30era bitartean. Salmentarekin bildutako dirua Intermonek Afrikan eta Hegoamerikan aurrera daramatzan proiektuetara bideratuko dute.

Ostiralean, berriz, Sanchez Romero Carvajal firmako urdaiazpiko mozle batek 5 jotako udaiazpiko moztuko du. Txistulari bandaren doinuek lagunduta, bezeroek eta lagunek hori dastatzeko aukera izango dute, 20:00etan hasita.