Gazteek, San Pedrok, herriak... denek izango dute bere tartea Igeldoko jaietan

Mikel Goñi

2012/06/28

Joxemari Olasagasti igeldotarra bihar jardungo da aizkoran eta idiekin. (Argazkia: Estitxu Zabala)

Gaur rock kontzertua izango da; datozen egunetan, herri kirolek bertsoek eta dantzak alaituko dute giroa. Igeldora igo da jai giroa eta bertan geldituko da datorren astelehena arte. Gazteek gaur izango dute egun handia, San Pedroren egunaren bezperan. Igeldotarrek eta bisitariek musikaz, herri kirolaz eta gastronomiaz gozatuko dute antolatzaileek prestatu duten egitarau zabalari esker. Gaurko eguna Gazteen Eguna izendatu dute Igeldon, eta printzipioz beraiei egokitutako ekimenak atondu dituzte. Herri poteoaren eta bertso afariaren ondoren, La Pop’lla eta Xalbala taldeen kontzertua izango da.

Bihar, berriz, ekinaren 29an San Pedro eguna ospatuko dute, herriko jaien egun handia. Diana, hamaiketakoa, erromeria… eta, nola ez, herri kirolak. Josemari Olasagasti bertako aizkolaria izango da, ohi moduan, protagonistetako bat.

Olasagasti goizean aizkoran arituko da, Joxe Etxebeste lagun duela, Donato Larretxea eta Luix Txapartegiren aurka. Arratsaldean, berriz, idi deman jardungo da igeldotarra.

Herri poteoa eta herri bazkaria izango dira ekainaren 30eko ekitaldirik nabarmenenak. Izan ere, jaietako antolatzaileek igeldotarrei eskaini nahi baitiete Herriaren Eguna izendatu duten larunbata. Igandean, berriz, arratsaldean, Julio Soto, Jexux Mari Irazu, Onintza Enbeita eta Amets Arzallus bertsolariek erakarriko dute arreta gehien.

Santa Ixabel egunean; hau da, astelehenean, bukatuko dira jaiak. Herri aurreskuaren ondoko dantzaldiak itxiko ditu, aurten ere, Igeldoko festak. Programa osoa ikusteko klik egin hemen, eta egitaraua jaitsi.