Duela hogei urte Donostiatik irten zen Frantziako Tourra, lau hamarkada lehenago hirian izan eta gero
Fausto Coppi Donostian izan zen, 1949ko Tourrean (Argazkia: Kutxa Fototeka).
Uztailaren 4an, sarrerako etapa egin zuten, erlojupekoa. 189 txirrindularik 8 kilometroko ibilbidea egin zuten hirian zehar. Udaletxetik irten ziren. Kontxako pasealekua, Zumalakarregi hiribidea, Tolosa hiribidea, San Martin kalea… Maria Kristina hotela izan zuten helmuga. Miguel Indurainek egin zuen denborarik onena, eta maillot horia jantzi zuen. Tourra ere hala bukatu zuen, maillot horiarekin.
Uztailaren 5an 194,5 kilometroko ibilbidea egin zuten. Donostiatik irten, eta ia Gipuzkoa oso-osorik zeharkatu zuten: Orio, Zarautz, Getaria, Zumaia, Zestoa, Azpeitia, Azkoitia, Zumarraga, Beasain, Ordizia, Tolosa, Andoain, Donostia, Pasaia, Errenteria, Jaizkibel, Hondarribia, Irun, Oiartzun, Astigarraga, Hernani eta Donostia. Helmuga Zurriola pasealekua izan zen. Bigarren etapa honetan Dominique Arnould izan zen garaile. Alex Zullek maillot horia kendu zion Induraini, denbora-sariei esker. Uztailaren 6an Donostia utzi zuten eta Pau-ra bidea hartu zuten txirrindulariek.
Coppi eta Bartali
Lau hamarkada lehenago, 1949. urtean, Frantziako Tourra Donostian izan zen ere. Lehen aldiz hiria aukeratu zuten lasterketari ostatu emateko. Coppi eta Bartali italiarren arteko lehia izan zen urte hartako itzulia, baina Donostian Caput frantziarrak altxatu zituen besoak, ihesaldi baten barruan azkarrena izan eta gero.
Bihar, Itzurun gehigarrian, Tourrak Donostian egindako bi egonaldiei buruzko erreportaje zabala argitaratuko du Irutxuloko Hitzak.
