Ogia kutxa batean
Bost kamioi kontainerrek osatzen dute Frantzia pasealekuko behin behineko okindegia. (Argazkia: Mikel Goñi)
La Salsera «ideia fabrikako» kidea da Andoni Munduate ataundarra. Bere taldearen buruetatik irten da behin behineko okindegiaren ideia, Musika parkean eta beste hainbat proiekturen moduan. Horretarako, ordea, laguntza izan dute; hain zuzen ere, ogiaren munduan aski ezaguna den Iban Yarza bilbotarra beraiekin arituko da uztailean, eta Munduatek dioenez, «munduko okinik onena, Dan Lepard, hiru hilabeterako ekarri dugu Donostiara».
Lepard Europa osoan ezaguna den The Handmade Loaf (Eskuz egindako ogia) liburuaren egilea da. Munduateren taldeak liburua erdaraz argitaratzeko lanak bukatu zutenean, Lepard Donostiara etorri zen ikastaroren bat emateko, eta aurkezpenerako. «Hiriarekin maiteminduta gelditu zen, eta etortzea eskaini genionean berak eskatu zigun hiru hilabeterako izatea».
Txanponaren bi aldeak Ogia artisauen moduan egiten du Lepardek, eta horixe bera da Frantzia pasealekuko «kanpainako okindegian» egin eta saltzen ari direna. Artisauen moduan lan egiteak ekoizpenaren kopuruari mugak jartzen dizkio. Horrek eta behin behineko okindegiak sortutako jakin minak ogia labetik irten bezain pronto saltzea ekarri dute. Egiako Maria Corral adineko emakumea da, eta zorionekoa izan da, 12:30ean labetik atera dituzten 80 ogietatik azkena erosi ahal izan duelako. «Atzo ikusi nuen hau hemen zegoela, eta ogia, baina benetako ogia, asko gustatzen zaidanez, gaur etortzea erabaki dut».
Olatz Guerrak ordea zorte gutxiago izan du, eta hurrengo labekada irten arte itxaron beharko du. «Gogo ikaragarria daukat ogi hori probatzeko. Leparden liburua etxean daukat eta bere ogia probatu nahi dut».
-
- Modu tradizionalean eta osagai naturalekin egiten dute ogia. (Argazkia: Mikel Goñi)
-
- Bertan egosten dute ogia. (Argazkia: Mikel Goñi)
-
- Labetik atera bezain pronto saltzen dituzte bertan egindako ogiak. (Argazkia: Mikel Goñi)
-
- Bost kamioi kontainerrek osatzen dute Frantzia pasealekuko behin behineko okindegia. (Argazkia: Mikel Goñi)
-
- Dan Lepard okin ingelesa dago behin behineko okindegiaren kargu. (Argazkia: Mikel Goñi)
