Andoni Baraibar: "Taberna ixten dudanean ez dakit hurrengo egunean lasai jaikiko naizen"

2012/07/12

Andoni Baraibar – Alaska tabernaren jabea Katalina Erauso kaleko Alaska tabernan bi aldiz lapurtu dute joan den hilabetean. Jabearen ustez, halakoak ugaritzen ari dira auzoan.

Andoni Baraibar lapurrek sartzeko erabili zuten zuloa behatzarekin erakusten. (Argazkia: Maitane Aldanondo)

Amara Berriko Alaska tabernak ia bi hamarkada daramatza zabalik; eta ekaina arte, ez zuten inoiz bertan ostu. Hogei eguneko aldearekin, ordea, Andoni Baraibarren tabernan (Areso, 1967) bi aldiz izan dute lapurren bisita. Bata ekainaren 4an, eta bestea, ekainaren 23an. Aurretik lapurretarik jasan al duzue? Hamazazpi urte daramatzagu hemen eta inoiz ez dira saiatu ere egin. Beheko tabernan sartu dira hiruzpalau aldiz eta ingurukoetan baten batean behin baino gehiagotan. Orain hilabetean bi aldiz. Behin sartzera ausartu dira, eta ondo atera zaiela ikusita… Bi aldiz hilabete bakarrean. Zer ostu dizuete? Lehen aldian, tabakotan 800 bat euro eraman zituzten, diru xehean geneuzkan beste 300 bat, musika jartzeko erabiltzen dugun ordenagailua eta anplifikatzailea. Horrez gain, tabako makina eta txanpon makina ere txikitu zituzten. Txanpon makinako dirua hartu zuten, baina hori ez da nirea. Eta bigarren aldian? Txanpon eta tabako makinak lehen alditik hutsik zeuden; baina tabakoarena itxita zegoenez, berriro puskatu zuten, barruan zerbait egongo zelakoan. Kaxan diru gutxi genuen, 30 bat euro txanpon txikitan. Ostearekin ez konformatu, eta bestelako kalteak ere eragin dizkizuete. Lehen aldian garagardo iturria irekita utzi zuten. Ondorioz, bi barrikak eta gasaren botila hustu ziren. Azkenekoan, aldiz, sukaldeko iturria utzi zuten irekita. Ez dakit taberna urez betetzeko asmoz egin zuten, baina arraska ondoko altzarirantz jarri zuten turrusta. Horrekin zortea izan genuen, altzariaren maldak ur gehiena arraskara bueltan eraman baitzuen. Besterik egin zuten ba al dakizue? Lehen aldian bi izan zirela uste dugu, bi irabiatu botila huts baitzeuden. Hozkailuan pintxoak eta egiteko prestatuta geneukan txatka eta bestelakoak ere jan zituzten. Bigarrenean ez zuten begi bistan halakorik utzi. Sartzeko bide bera erabili al dute bietan? Ez. Tximinia bat genuen, baina araudia betetzen ez zuenez, udalak kendu arazi egin zigun. Zulo horretatik sartu ziren lehen aldian. Folio baten tamainakoa da. Bigarrenean, aldiz, kristala puskatu eta zulo txiki bat egin zuten. Sei milimetroko lodiera duten hiru kristal dira, eta tartean xafla bat dute. Kristala kolpatu eta egurra askatu egin zen beheko aldetik. Handik pasatu ziren. Ondoko eraikineko aldamioak estali egiten zuen aipatu duzun zuloa. Taberna ezagutu behar da hor dagoela jakiteko. Aldamioak abantaila eman die lapurreta egiteko, baina zuloa estali egiten zuen. Begiratu egin behar da hor daudela jakiteko. Apirilaren 3tik zegoen zuloa, eta ekainaren 4an sartu ziren. Zulo hori hor zegoela eta sar zitekeela jakiteko edo inguruan ibili ziren edo aukera ikusi zuten. Inguruan ibiltzea eta nondik sartu aurkitzea normala da, hori baita beraien lana. Aztarnarik utzi al dute? Lehendabiziko sartualdian eskularruak edo erabili zituzten, eta poliziek ez zuten aztarnarik aurkitu. Bigarrengoan, aldiz, bazeuden. Atzamarka asko eta odola ere bai. Nonbait tabako makina irekitzeko labanarekin saiatzean moztu, eta odola zegoen. Hartu zituzten laginak, baina inor ez zaigu etorri nor izan den aurkitu dutela esatera. Inguruan lapurreta gehiago izan al da? Orain hilabete batzuk beherago dagoen Korta tabernan lapurreta egin zuten. Urtebete ere ez da. Irudipena dut ugaritzen ari direla. Segurtasun neurririk hartuko al duzue? Kamerak edo alarma jarriz kikiltzen saiatuko gara. Alarma jartzeko asmoa dugu, baina konpainia pribatu batek muntatu eta mantentzea urtero 600 bat euro dira. Batek ez lapurtzeko beste batek lapurtzea… Hemen ezer ez balego, baina lau polizia erakunde ditugu! Horrenbeste diru gastatzea segurtasunean… Noren segurtasunean? Ixten dudanean ez dakit hurrengo egunean lasai jaikiko naizen. Lapurrak harrapatuta ere, ez zaie ezer gertatzen, ia egun berean kalera ateratzen dira. Eta gaizkileei zigorrik ez bazaie jartzen… Nola bizi izan duzue gertatutakoa? Azkeneko aldian Frantzian ginen. Normalean larunbatetan bakarrik ixten dugu taberna, baina asteburu horretan, ostiral arratsaldean itxi genuen astelehena arte jai egiteko. Larunbatean goizeko bederatziak aldera udaltzaingoak deitu zigun. Sustoa da. Urtean asteburu bakarra hartuko lasai pasatzeko, eta bueltan etorri behar izatea… Etsituta al zaude? Etsipena baino ezinegona da. Bi aldiz sartu dira denbora gutxian, eta kristoren zarata egin arren, lasai sartzen dira, inork ez dio poliziari jakinarazten. Nik gaur gauean tabernan festa egin eta musika pixka bat altuxeago jarriko banu, segituan etorriko lirateke udaltzainak, GEOak eta enparauak zertan ari garen ikustera… Kalte ordainekin konformatu beharko duzue. Aseguru etxeak oso ondo jokatu du konponketekin. Lapurretaren egun berean bidali zuten igeltseroa zuloa estaltzera; eta egun gutxitara, margotu eta txukun jarri zuten. Kristala ere berehala konpondu zuten. Lapurtutakoaren balioa ez dugu oraindik jaso, eta ez dakigu ez zenbat ezta noiz emango diguten ere.