Karmengo festetako lehen txanpari ekingo diote asteburu honetan Añorgan

Mikel Goñi

2012/07/13

Arkaitz dantza taldea igande eta astelehenean arituko da Añorgan. (Argazkia: Mikel Goñi)

Besteak beste, kirol erakustaldiak eta lehiaketak, gastronomia zein musika dira egitarauaren osagaiak. Karmengo egunaren inguruan ospatzen dituzte festak Añorgan. Egun handia izanik ere, ezin programaren ekitaldi guztiak bertan sartu, eta zortzi egunen artean banatu dituzte zeregin guztiak. Era berean, bi txandatan berezi dituzte horiek guztiak; gaurtik astelehenerakoa izango da lehena. Bigarrena, aldiz, hilaren 19tik 22ra.

Pilota izango da gaurko protagonista. Izan ere, Jolas Etxea Txiki pilota eskolako erakustaldiak irekiko baitu 17:00etan festetako programa. 21:00etara itxaron beharko da, Jauregi eta Loidi nor baino nor ikusteko, buruz buru. Horren ondoren jokatuko da Goñi II.a eta Fernandez, Urmenetaren eta Eulateren aurka jarriko dituen partida. Horrekin batera bukatuko da egitaraua gaurkoz.

Koadrilei emandako eguna izango da biharkoa. Hori dela eta, hauen bazkaria izango da frontoian, 14:00etan. Hori baino lehenago, ordea, paellak prestatzeko eta ingurua apaintzeko hitzordua egin dute eguerdian. Sabela beteta eta Debako Elektrotxarangaren doinuak lagunduta, banderaren altxatzea egingo dute, modu honetan jaien hasiera ofiziala ezarriz. Egunak luze joko du, izan ere, ogitarteko jatearen ondoren, gauerdian hasiko baita 3gabe2 taldearen emanaldia.

Igandean, Jubilatuen Eguna izango da, eta astelehenean Karmengo Amarena. Bi egun horietan Añorgako Arkaitz dantza taldearen jardunak berebiziko garrantzia izango du.

Jaien hurrengo txanpa berriz, ostegunean hasi eta hurrengo igandean bukatuko da. Ordurako utzi dituzte, besteak beste, Zementonen jaitsiera eta Izkiro mozorro festa. Programa osoa ikusteko, klik egin hemen.