Suen ondoren... zezensuzkoak!
Kontxa gaineko zerua pizteko ez, baina Londres hotela eta udaletxearen arteko bidea kolorez eta argiz betetzeko gai dira zezensuzkoak Aste Nagusiko gauetan. Hain zuzen ere, jaiotan, egunero, su artifizialen ondoren sei zezen beltz su petardoz eta bengalaz beterik irteten dira korrika, haurren gozagarri den entzierro argitsua osatzeko.
Joaneko bidaian haurren algarak eta korrikaldiak sortzen badituzte; itzulerakoan, berriz, txaloak jaso eta txikienen jakin mina asetzen dute. Su artifizialen moduan, aurten, zezensuzkoek jardun bat gutxiago egingo dute, ostiralean izango baita azkeneko korrikaldi argitsua.
