Hamar urte, hamaika bizipen
Aieteko Lantxabe auzo elkartearen hamar urtetako lana islatzen saiatu dira erakusketa batean, hogei kartelen bitartez
Aieteko Lantxabe auzo elkarteak hamar urte bete ditu. Hamar urte bete ditu, baina hamaika bizipen dituzte kontatzeko. Hamaika bizipen dituzte, baina hogei karteletan bildu dituzte beren unerik esanguratsuenak. Datu saltsarik ez genuke sortu nahi Lantxaberen inguruan, bestela ere nahiko saltseroa izatearen ospea bereganatu baitu auzo elkarte honek.
Felix Perez eta Juan Carlos Berzosak ederki ezagutzen dute erakusketako kartelek gordetzen dutena, ia hasieratik baitabiltza lanean Lantxabe auzo elkartean. Alor desberdinak jorratu dituzte: protesta ekimenak, jaiak, jarduera kulturalak, kirola… azken finean, auzo bizi batean sortu daitezkeen jarduera guztiak. Aiete auzo bizia dela diogu, baina ez omen da beti horrela izan. Juan Carlos Berzosaren esanetan, «Aiete oso zabala da, oso sakabanatua eta piskanaka-piskanaka lortzen ari bagara ere, bertako bizilagunak ez ziren aietearrak sentitzen; bakoitza bere etxe inguruan mugitzen zen, baina ez zegoen Aieteko auzotar sentimendurik».
Batasun hori lortzeko auzo-elkarte bat sortzea izango zela onena pentsatu zuten. Lagun talde bat bildu eta Errege Magoei eskutitza idatzi zuten, ondoren etxez etxe banatu zutena. «Ametsez edo ilusioz beteriko eskutitza zela esan izan digute askok, baina orduko ilusio asko errealitate bihurtuak daude gaur egun; Aieteko parkean Kultur Etxea eraikitzea, adibidez», dio Felix Perezek.
Katxola ere Lantxabe bizilagun elkarteak harrotasunez goraipatzen duen lorpena da. Harriz harri berreraiki zuten, eta Munto baserritik ekarritako dolarea martxan jarri zuten bertan. Lantxabek du Katxola baserria kudeatzeko ardura, eta zintzo betetzen du bere zeregina, urtean zehar hainbat ekimen burutzen baitira bertan.
Aiete, auzo zabala
Aietek 14 mila biztanle ditu gutxi gora-behera, eta auzotar guztientzako bederatzi taberna eta sei denda besterik ez daude. Oraindik dituen gabezien isla izan daitezke datu hauek. Kultur etxea egin arte ez zuten bilgunerik.
Era berean, Lantxabe auzo-elkartea bera ere erreferente bihurtu da bizilagunen artean. «Denetariko kexak, proposamenak, kritikak, enkarguak… jasotzen ditugu, eta gu gustora, auzorako onuragarria den edozertan aritzeko prest gaude eta», onartu du Juan Carlos Berzosak. Askotan bizilagun eta erakundeen arteko bitartekari lana egitea tokatu zaiela onartu dute; «arreta gehiago egiten digute guri Lantxaberen izenean joanda, auzotar soil bat joanda baino. Pisu hori urtetako lanarekin lortu dugu, eta probetxua atera behar zaiola uste dugu», aitortu du Felix Perezek. Baina ez dira proiektu handiak esku artean dituzten guztiak; auzoa eta auzotarren zaindari lana ere egiten omen dute sarri. Adibidez, Aieteko parkean lehen ez zegoen kaleargirik, eta ez zen batere ikusten. «Kultur etxeko langileek mesedez beraiekin geratzeko eskatu ziguten behin, oso iluna zegoela, eta beldurra ematen ziela bakarrik geratzea», dio Felix Perezek.
Lantxabe, errefentzia puntua
Oso auzo elkarte bizia da Lantxabe. «Gehienak 55 urtetik gorakoak gara, eta orokorrean denbora asko dugunez, Aiete zaintzen saiatzen gara», dio Felix Perezek. Gazteak ere hasi omen dira ekimenak antolatzen. Beraz, etorkizunean ere, badute Lantxabe saltsero baten esperantza.
Momentuan beraiei tokatzen zaie lan egitea. «Saltsa guztietan sarturik gaude, baina Aieteko izaera sendotzea lortzen badugu, gustura ariko gara», aipatu du Juan Carlos Berzosak. Piskanaka, Aieteren garapena ikusi dute; «baina oraindik badago zer egina, Miramongo Parkearen etorkizuna erabaki gabe dago», dio Felix Perezek.
Lantxabek adin guztietako bizilagunengana heldu nahi du, eta mota guztietako ekimenak antolatzen dituzte. Erakusketako karteletan atzeman daiteke aniztasun hori, eta hamar urteen pisua ere bai: «Hasierako kartelak oso xumeak dira, beste batzuk berriz oso bitxiak; garai eta egile desberdinen isla dira», aipatu du Felix Perezek. Garai berrietara moldatzeko ahalmena eta lanerako gogoa dira Lantxabe auzo-elkartearen birtute.
Juan Carlos Berzosa eta Felix Perez, Lantxabe auzo elkarteko kideak. (Argazkia: Agurtzane Altuna)
Lantxaberen hamar urtetako lana, hogei karteletan bildua. (Argazkia: Agurtzane Altuna)
