Illunbe zezen plazaren kanpoaldea (Argazkia: Estitxu Zabala).Estitxu Zabala
Donostia Arena 2016ko barrutia alokatzeko prezio publikoak jartzeko proposamena onartu zuen atzo udalbatzak, EAJk proposatuta. Erabaki horrekin zezenketak egin ahal izango dira Illunben, udal gobernuaren iritziaren kontra. Jeltzaleekin batera, PSE-EEk eta PPk baiezko botoa eman zuten; Bilduk, ordea, ezezkoa.
Oposizioak bat egin zuen, eta PSE-EE eta PPko kideek ez zuten inolako erreparorik izan EAJren ekimena txalotzeko. «EAJk proposamen hau ekarri izan ez balu, Illunben ez lirateke zezenketak ospatuko», nabarmendu zuen PPko ordezkari Jose Luis Arruek.
Zezenketen inguruko eztabaida Bilduren etorrerarekin hasi zen udalean. Udal gobernuak zezenketak antolatzeko lehiaketarik ez zuela deituko iragarri zuen duela hilabete batzuk. Hain zuzen ere, Juan Karlos Izagirre alkateak aurreratu zuen hurrengo urtean ez zutela Illunben zezenketak egin zitezen hitzarmen berririk sinatuko. EAJk, baina, «B plana» aurkeztu zuen handik gutxira, eta atzoko udalbatzarrean lortu zuen berearekin ateratzea. Izan ere, beste hainbat ekimen egiteko bezala, zezenketetarako ere Illunbe enpresei alokatzea proposatu zuen EAJk atzo, eta proposamen hori izan zen udalbatzarrean adostutakoa.
Orain arte, zezen plaza udalaren kontzesioz ateratzen zen lehiaketara. Jakinda udalak ez duela lehiaketarik deituko, formula horrekin jeltzaleek zezenketei atea ireki diete, PSE-EE eta PPren babesarekin. «Zezenketak antolatzeko asmoz diru bat ordaindu nahi duenak, egin dezala», adierazi zuen EAJko ordezkari Iñaki Gurrutxagak.
Bilduk, bere aldetik, udal gobernuaren bozeramaile Josu Ruizen hitzetan, berretsi zuen zezenketak ez direla «sektore estrategiko bat».
Igara eta Igeldo
Urteko azken udalbatzarrean beste erabaki batzuk hartu zituzten, horietako batzuk aho batez. Igarako bidean kanpin bat eraikitzeko egitasmoari argi berdea eman zioten, esaterako, alderdi guztien adostunarekin.
Hirigintza zinegotzi Ricardo Burutaranek azaldu zuen lur eremua erabilita dagoela jada; beraz, ez dutela espazio berririk okupatuko proiektua egiteko. Igarako tenis pistak zeuden lekuan nahi dute kanpina eraiki. PPko Jose Luis Arruek iragarrizuen proiektuak hogei bat lanpostu ekarriko dituela, eta milioi bateko inbertsioa izango dela enpresarentzat.
Proposamena aho batez onartu arren, Haritzalde Naturzaleen Elkarteak erabakiaren kontra egin zuen, prentsa ohar baten bitartez. «Jarduera, Igarako bailaran dauden natur balioen kontserbaziorako, eta bere osotasunean hartuta Mendizorrotz mendiarentzat, mehatxu zuzena iruditzen zaigu», jakinarazi zuen.
Bestalde, Igeldoko kanpina zabaltzeko proposamenari ere baiezkoa eman zion udalbatzak, aho batez, kanpin horrek lehen mailako kategoria manten dezan. Karabanek leku gehiago izango dute handitzearekin, eta kirol gunea hobetuko dute.
Rafael Munoa kalea
Plasentziako Kondea kalearen izen aldaketan ere egon zen aho bateko adostasuna. Rafael Munoa kalea deituko da orain Kontxa pasealekua eta Zubieta kalea lotzen dituen etxartea.
Hain justu, Plasentziako Kondea, Jose Arrospide Alvarez, Emilio Mola jeneralaren laguntzailea izan zen tropa frankistak 1936ko irailaren 13an Donostian sartu zirenean. Horrenbestez, udal gobernuko ordezkari Ricardo Burutaran pozik agertu zen aldaketarekin, frankismoarekin zerikusia duten ikurrak ezabatzea ezinbestekoa dela adierazi baitzuen.
Oposizioko taldeek, bere aldetik, Plasentziako Kondeari buruz baino, Rafael Munoaren inguruan hitz egin zuten; Parte Zaharreko marrazkilariaren izenak hartuko du orain kale hori. Munoa joan den maiatzean hil zen, 82 urterekin. «Donostiarren izaera islatzen zuen pertsona bat zen», ekarri zuen gogora PSE-EEko bozeramaile Ernesto Gascok.
Era berean, aho batez ere, Intxaurrondoko plaza bati Gaztañaga izena jartzea erabaki zuten, bertan zegoen baserriaren omenez. «Toponimia da hiri baten lekuko fidelena», esan zuen EAJko ordezkari Miren Azkaratek, eta izendapen honekin memoria babesten dela nabarmendu zuen. Auzotarren ekimenez proposatu zuten izendapen hau.
Txillardegi
Hiritar Merezimenduaren Dominarekin saritutako bost herritarren izenak berretsi zituzten atzo. Horrenbestez, Jaime Caballero igerilaria, Txotxongillo taldea, Luisa Etxenike idazlea, Donostia Ospitaleko Neonatologia unitatea eta Jose Luis Alvarez Enparantza Txillardegi aukeratu zituzten, ofizialki.
Udal taldeek bost izen horien alde egin zuten, PPk izan ezik. Hauek abstentzioaren aldeko hautua egin zuten, izendatutakoen artean Txillardegi zegoelako. PPko bozeramaile Ramon Gomezek argitu zuen, ezezkoa eman beharrean, abstentzioaren alde egin zutela «beste lau herritarrekiko errespetuagatik». Lau donostiarrak zoriondu zituen ondoren; ez, ordea, Txillardegi. «Ez nago prest talde terrorista bat sortuzuen persona bat gogoan izateko», azaldu zuen PPko ordezkariak.
