Alerta horia jarri dute eta 'elurrak plana' bihar arte luzatu

Irutxuloko Hitza

2013/02/25

Elurra Igeldon. (Argazkia: Agurtzane Altuna)

Elur arriskua 200-300 metrotan dago, baina izotza eta hotza dela eta, bihar arte mantenduko dute alerta. Gaur eta biharko alerta horia ezarri dute elurra eta izotza dela eta. Gaur arratsaldean elur-kota 200-300 metro ingurura igoko dela azaldu dute. Era berean, esan dute, aukera handia dagoela zaparrada txiki eta ertainak botatzeko, trumoi-ekaitzak izateko zein txingorra egiteko. Eguraldi iragarpenaren arabera, ez dirudi Donostian elur arrisku handirik dagoenik, baina tenperatura baxuak eta izotza direla eta, ‘Elurrak Plana” martxan mantenduko dute bihar arte. Hortaz, Babes Zibileko agente guztiak, suhiltzaileen kamioiak, lur orotako ibilgailuak eta anbulantziak erne jarraituko dutela jakinarazi dute. Gainera, prebentzio-neurri gisa, gatza botako dute ospitaleetan, anbulatorioetan, eguneko zentroetan, autobusaren ibilbideetan eta heziketa-zentroetan. Denboraleak ez du aparteko gorabeherarik eragin asteburu honetan. Argazki galeria honetan ikusiko duzu nola esnatu den gaur goizean Igeldo.