Herri kontsulta bertan behera uzteko eskatu du Espainiako estatu abokatuak
Aldundiak herri kontsulta ez lotesleak egiteko eskumen osoa duela defendatu du.
Foru Aldundiarentzat Espainiako estatu abokatuak Igeldoko herri kontsulta ez egitea eskatu izana lekuz kanpokoa da, eta demokraziaren eta legearen ikuspuntutik ez du zentzurik. Prozesua eragotzi nahi izatea onartezina da Aldundiarentzat, legearen, demokraziaren eta herri borondatearen kontra jotzen duelako bete-betean.
Foru Aldundiak jakinarazi duenez, Igeldoko herri kontsultaren inguruko jarrera eta praktika erabat legezkoak dira. Gipuzkoako Herritarren Partaidetzari buruzko uztailaren 8ko 1/2010 Foru Arauaren baitan legeztatzen baita Aldundiak eskumen osoa duela herri kontsulta ez lotesleak antolatzeko. Eta Aldundiaren arabera, horixe da Igeldokoa, herri kontsulta ez loteslea. Herri kontsulta partaidetza prozesu luze baten barnean kokatzen da, galdeketa da azken urratsa, eta herri partaidetza galaraztea dakar estatuko abokatuaren idatzia, Aldundiak adierazi duenez.
Estatuko abokatuak ‘oso behin behineko kautelazko neurriak’ aplika ditzala eskatu zion, herenegun, idatzi bidez, Donostiako Administrazioarekiko Auzien Epaitegiari, eta atzo jakin zuen horren berri Foru Aldundiak. Aldundiko talde juridikoa erantzuna lantzen ari da, eta berandu baino lehen helaraziko dio epaileari.
