Josu Ruiz jarduneko alkate moduan, Igeldori buruzko batzorde berezian. (Argazkia: Agurtzane Altuna)
Igeldotarrek eman dute beren iritzia, baina desanexioak albiste izaten jarraitzen du biharamunean ere. PP eta PSE-EEk hala eskatuta, Zerbitzu Orokorretako batzordeak urgentziazko bilera egin du gaur udaletxean. Premia hori izan da hasteko erabaki dutena, Bilduk ez baitzuen horretarako beharrik ikusten, eta EAJ abstenitu egin da, bilera ahalbidetuz.
Hortaz, PP eta PSE-EEk Juan Karlos Izagirre alkatearean agerraldia eskatu dute. Gaiaren inguruan daukan jarrera neutralari eutsiz, Izagirre ez da batzordera etorri, eta Josu Ruiz, jarduneko alkatea izan da bertan.
Esan bezala, goizean goizetik kazetari eta politikarien joan etorria nabaria izan da udaletxean,
herri kontsultaren emaitzak aztertu eta balorazioak egiteko eguna izan baita gaurkoa.
Alderdi politikoen balorazioa
Bildu: Axier Jakak hitz egin du udal gobernuaren izenean. Igeldotarrak zoriondu ditu lehenik galdeketan parte hartzeagatik. Desanexioaren aldeko emaitza atera bazen ere, ezezko botoa ematera joan ziren herritarrak ere zoriondu ditu,”
iritzia emateko eskubidea baita udal gobernuak defendatzen duen ereduaren oinarria”, Jakaren esanetan.
Gainera, partaidetza zinegotziaren ustez, herri kontsultaren parte hartzeak agerian uzten du
“zalaparta talde politikoen artean dagoela eta ez herritarren artean; herritarrek naturaltasun osoz hartzen dute beraien iritzia jakin nahi izatea”.
Iritzi hori baiezkoa izan zen, desanexioaren aldeko 391 botorekin eta kontrako 234 botorekin. Hemendik aurrera, Foru Aldundiari dagokio erabakiak hartu eta pausoak ematea Jakaren arabera; hori bai, erabaki horretan herritarren iritzia “kontuan hartzea” espero du udal gobernuko zinegotziak. Bere hitzetan,
“herri galdeketak, emaitza kontuan hartzeko egiten dira”.
PP: Ramon Gomez PPko zinegotziak ere errespetatzen ditu atzo Igeldoko kultur etxera joan ziren herritarrak, eta
lasaitasunerako deia egin diete desanexioaren kontra bozkatu dutenei, eta baita kontsulta parte hartu ez dutenei ere.
Emaitzari dagokionez,
PPri “eskasa” iruditu zaio atzoko emaitza, aldeko botoak ez direlako erroldaturiko bizilagunen erdira ere iristsi. (883 bizilagunetatik 391). Baina emaitzak emaitza, galdeketa prozesua bera zalantzaz jarriz, hemendik aurrera gertatuko dena jakin nahi du PPk. “Garitano eta Izagirrek saltsa batean sartu gaituzte, iritzi bat jaso dute, baina ez da iritzi bat besterik.”, esan du Gomezek.
Izan ere, zinegotzi popularraren ustez, Gipuzkoako Batzar Orokorretan hartu beharko dute erabakia, beraz, galdeketa honen bidez Igeldoko bizilagunei “itxaropen faltsuak” besterik ez zaizkie sortu.
Beste behin ere, Izagirre alkateari eta udal gobernu osoari gaiaren inguruko iritzia eskatu die Gomezek. “Hiriaren osotasuna suntsitu nahi dute eta udal gobernuak ez du ezer esaten; berriro esango dugu, ez bada hiria eta hiritarren beharrak kudeatzeko gai,
dimititu dezala“, esan du Ramon Gomezek.
PSE-EE: Ernesto Gascoren ustez ere “penagarria da Igeldoko auzian alkatea presente ez egotea”, Gascoren esanetan donostiar guztiek duten arazo bati irtenbidea emateko garaia baita, eta
elkarlanerako borondatea erakutsi du.
Izan ere, sozialistei ongi iruditu zaie igeldotarrei iritzia eskatzea, eta desanexioaren aldeko emaitzak argi erakutsi du “ez daudela gustura dauden moduan”. Dena dela, Gascoren arabera,
lortutako emaitza ez da nahikoa Igeldo Donostiatik banatzeko. “Argi dago desanexioaren aldeko iritzia oso kontuan hartzekoa dela, baina ez da nahikoa”, esan du Gascok. Dena dela, errealitate horrek erantzun bat behar duela gaineratu du sozialisten bozeramaileak. “Arduraz jokatu eta denon artean lana egiteko garaia da; ezin dugu Aldundiaren erabakien zain geratu”, esan du Gascok.
Zentzu horretan,
donostiarren etorkizuna udalak erabaki behar duela defendatu du Gascok; “Donostiar gisa ez nuke nahi Foru Aldundiak gobernatzea hiri hau; edozein koloretakoa delarik ere gobernua”.
EAJ: Jeltzaleek atzoko emaitza “espero zena” izan dela esan dute.
“Neurrira egindako herri kontsulta bat izan da, beraz, ez gaitu emaitzak harritu”, esan du Eneko Goiak.
Emaitza errespetatzen dutela esan dute jeltzaleek, baina galdeketan ez zirela aukera guztiak eskaini salatu dute. “Auzo udal izateko aukera defendatuko dugu guk; beti egin izan dugu horrela, eta hemendik aurrera ere bai”, esan du Goiak.
Igeldok beti izan duela izaera berezia esan du Goiak, “
Donostiar gisa ez dira gustura sentitzen, eta hori porrot politikoa da“. Porrot hori urte askoan luzatu dela gaineratu du Goiak, eta partidu politikoek horren inguruan hausnartu beharko luketela esan du.
Ez dutela Igeldoren desanexioa nahi argi adierazi dute jeltzaleek, eta
udal gobernuari ere argi hitz egiteko eskatu diete. “Alde edo kontra, baina beraien jarrera definitu beharko dute, gure ustez udalak hartu behar baitu iniziatiba gai honi irtenbidea emateko, behingoz”, esan du Goiak.
Pasa den ostegunean Igeldon izan ziren jeltzaleak eta oso gustura geratu ziren herritarren jarrerarekin. “Errespetuz, ikuspegi ezberdinak jorratu genituen, guk gure proposamenak argi erakutsi genituen, eta oso aberasgarria izan zen; pena bakarra lehenago igo ez izana”, esan du Goiak.
Dena dela,
lege aldetik Igeldoko desanexioaren gaiak ez du ibilbiderik EAJren ustez, beraz irtenbide politikoak bilatu beharko direla uste dute.
