Emakumeen Etxeak hainbat ikastaro antolatu ditu literatura feminista ardatz hartuta
Urritik ekainera egingo dituzte ikastaroak, eta izen emate epea zabalik dago dagoeneko.
Ikasturte berrirako Emakumeen Etxeko eskaintzaren artean, feminismoa eta literatura uztartzen dituzten hiru jarduera daude: literatura feminista ikastaroak, bat euskaraz, Iratxe Retolazaren eskutik, eta, bestea gaztelaniaz, Merche Trancheren eskutik. Eta, bestetik, irakurle eskola feminista.
Naiara Sampedro, Berdintasun zinegotziaren arabera, Emakumeen Etxeak programa osatua eta aberatsa antolatu du. Bere hitzetan, “emakumeen eskutik, emakumeei buruz eta emakumeen ikuspuntutik jorratutako ikastaroak dira”. Ikastaroaren metodologia praktikoa eta parte hartzailea izango da. Literatura testuen irakurketa eginez, parte hartzea eta eztabaida bultzatuko dituzte.
Iratxe Retolazak zuzenduko duen ikastaroak euskal literaturan sexualitatea nola jorratu den izango du ardatz. Urritik ekainera bitartean egingo diren irakurketa saio hauetan literaturara hurbiltzeko bi begirada gurutzatuko dira. Batetik, sexualitatearen eraikuntzaren eta errepresentazioaren inguruko hausnarketa, eta bestetik, begirada feminista.
Mertxe Tranchek emango ditu gaztelaniazko ikastaroak. Emakumeek gaztelaniaz idatzitako literatura berrirakurtzea izango da helburua. Ikastaroa ostegunetan izango da, hamabostean behin, urritik ekainera, 19:00etatik 21:00etara
Ikastaro hauek Bentanazaleak izango dute izenburua. Trancheren arabera, “mendeetan ez zen irain okerragorik izan emakume batentzat bentanazale edo hitzontzi deitzea baino. Etxeetan edo komentuetan itxita bizi zirenez, leihoa zuten ihesbide bakarra, eta letra idatzia, berriz, haien gogamenaren leiho.
Irakurle eskola feminista ere Iratxe Retolazak gidatuko du. Irakurle talde honetan pentsamendu feministan arakatzea izango dute helburu, eta pentsamendu feministak sorturiko galderak, kezkak, giltzarriak eta diskurtsoak eztabaidatuko dituzte.
Irakurketa saioak ostegunetan egingo dituzte, 19:00etatik 21:00etara, ondorengo egunetan: urriak 9, azaroak 27, abenduak 18, urtarrilak 29, otsailak 26, martxoak 26, apirilak 23, maiatzak 21 eta ekainak 18.
Ikastaroetan izena emateko bideak hauek dira: Emakumeen Etxean 943483470 telefonora deituz, edo Berdintasuna@donostia.org eta Info@donostiakoemakumeenetxea.com helbideen bidez.
