'Parketarrak' egitasmoa astelehenean itzuliko da

Aritz Sorzabal

2014/09/26

Egitasmoaren saio bat. (Argazkia: Donostiako Udala)

Donostiako Udaleko Euskara Zerbitzuaren ekimenez eta Donostiako zortzi auzoetako euskara batzordeekin elkarlanean, Parketarrak izeneko haurrentzako egitasmoa jarraipena izango du irailean eta urrian hiriko zortzi auzotako hainbat parke eta plazetan. Hauek dira auzoak, hain justu: Amara Berri, Añorga, Bidebieta, Altza, Intxaurrondo, Loiolako Erribera, Martutene eta Parte Zaharra. Parketarrak ekimenaren helburu nagusia haurrak kalean eta parkeetan jolasean ari direnean euskara erabiltzea da. Urtxintxa eskola aurrera eramaten ari den egitasmo hau bi programatan banatuta dago: bata 3-5 urte bitarteko haurrentzat eta beraien familientzat antolaturikoa; eta bestea 6-9 urte bitarteko haurrentzat. Ekimena doakoa da. «Martxoan eta maiatzean eraman ziren aurrera lehendabiziko saioak, astean behin, eta ekimena arrakastatsua izan da oso. Haur askok parte hartu zuten jolasetan eta gurasoen harrera ere ezin hobea izan da. Hori dela eta, iraila-urrian segida emango zaio ekimenari», azaldu du udalak.

Hain zuzen ere, Nerea Txapartegi Udal Gobernuko Euskara arduradunak berretsi du ekimenaren helburu nagusia familiek eta haurrek parkean euskaraz egitea dela. «Jolasak lagungarriak dira horretarako, jolasen bitartez hizkuntza lantzen baita batetik eta euskara kalean erabiltzeko ohitura areagotzen da bestetik. Hizkuntzaren erabilera ludikoa lantzen da, hau da, euskaraz jolas egiten ondo pasako dute eta lagunarteko harremanak euskaraz eraikitzeko urrats garrantzitsua izango da». Bere hitzetan garrantzitsua da haurrek ikustea euskara esparru guztietan erabil dezaketela eta ez dutela nahitaez gaztelerara jo beharrik jolasteko, behar dituzten esamoldeak edo esaerak aurkitzeko. «Haurrek eta gazteek, sarritan, euskara eskolan bakarrik erabiltzen dute edota familian. Kalean berriz, aisialdian, gauzak aldatu egiten dira eta lagunartean komunikatzeko garaian, euskara askoz ere gutxiago erabiltzen dute eta sarritan nahikoa txikitatik hasten da prozesu hori. Joera hori aldatzeko Parketarrak ekimena lagungarria da», adierazi du.

Egutegia:

Martutene	Iraila: 29 Urria: 6-13-20 (astelehenetan)	3-5 urte: 17:00 6-9 urte: 17:00	3-5 urte: parke nagusia 6-9 urte: futbito zelai ondoan
Altza	Iraila: 29 Urria: 6-13-20 (astelehenetan)	3-5 urte: 17:00 6-9 urte: 18:00	Larratxo plaza
Loiolako Erribera	Iraila: 30 Urria: 7-14-21 (astearteetan)	3-5 urte: 17:30 6-9 urte: 17:30	Santiago Plaza eta Giuseppe Verdi Plaza
Parte Zaharra	Urria: 1-8-15-22-29 (asteazkenetan)	3-5 urte: 17:00 6-9 urte: 18:00	Zuloaga
Intxaurrondo	Urria: 2-9-16-23 (ostegunetan)	3-5 urte: 17:00 6-9 urte: 18:00	Kultur etxea
Amara Berri	Urria: 2-9-16-23-30 (ostegunetan)	3-5 urte: 17:00 6-9 urte: 17:00	Araba parkea
Añorga	Urria: 3-10-17-24 (ostiraletan)	3-5 urte: 17:00 6-9 urte: 17:00	Ikastola
Bidebieta	Urria: 3-10-17-24 (ostiraletan)	3-5 urte: 17:30 6-9 urte: 18:30	Isasa parkea (Elizaren atzealdean)