Sarekide izateko bideak aurkeztu dituzte

Lide Ferreira

2014/10/18

Euskal presoen giza eskubideen urraketarekin amaitzea dute helburu.

Koldo Mitxelenan egin dute agerraldia, hainbat aurpegi ezagunekin. (Argazkia: Sare)

Duela hilabete inguru, euskal presoen sakabanaketa munduan ezagutaraztea jarri zuen erronka gisa Sarek Bilbon egindako ekitaldian. Horretarako, eta dispertsioarekin amaitzeko helburuarekin, 500.000 liburuxka kaleratuko dituzte. Oraingoan, lan hori aurrera eramateko bidea egin nahi dute, ahalik eta sarekide gehien lortuta. “Sareak ehuntzeko sarekideak behar ditugu. Sarea ez baita hutsean, airean, osatzen. Herritarren beharra du”. Kontxita Beitia eta Ines Osinaga musikariak egin dute deia Koldo Mitxelenan, beste hainbat lagunekin batera: Xabier Oleaga, Maialen Lizarralde, Jakue Pascual, Jesus Uzkudun, Teresa Toda, Alaia Martin, Julio Soto, Joxe Mari Elosua, Maika Tameron, Joxe Mari Agirretxe “Porrotx” eta Pello Reparaz. Sarekide izateko hiru bide daudela azaldu dute:

Sareren webgunean SAREKIDE atalean sartu.
Harremana@sare.eus helbidera edo sare sozialetara mezu bat bidali.
Sarek antolatuko dituen aurkezpen, ekimen…eta bestelakoetan aurkituko dituzten fitxak bete.

Fitxa betetzeaz gain, 5 euro bildu eta horrela 500.000 liburu horiek finantzatuko dituzte, “giza eskubideen urraketa honen berri mundu osoan zabaltzeko”.