Abesbatzen Astea ostegunean abiatuko da

Estitxu Zabala

2014/10/27

Bost taldek emanaldi bana eskainiko dute, hiriko parrokietan.

Singapurgo Syc Chamber Choir abesbatza.

Abesbatzen Astea antolatu du aurten ere Donostia Kulturak, Tolosako Ekinbide Etxearen laguntzarekin. Emanaldiak urriaren 30etik azaroaren 3ra izango dira, hau da, ostegunetik astelehenera. Zehazki, Tolosako 46. Abesbatza Lehiaketa jokatuko dute hamalau abesbatzek (urriak 30-azaroak 2), eta horietako bost taldek Donostian emanaldi bana eskainiko dute. Taldeen aniztasuna eta aberastasuna nabarmendu dituzte antolatzaileek, hala, kontzertuetan, musika erlijiosoa zein profanoa entzuteko aukera egongo dela aipatu dute. Bost abesbatzak emakumeen zein gizonen ahotsekin osatuak daude, eta Amerika, Asia etan Europakoak dira. Saio guztietarako sarrera doakoa izango da.

ABESBATZEN ASTEA 2014. EGITARAUA:

Urriak 30, 19:30. Choros Amici (Erresuma Batua), Altzako San Martzial parrokian.

Partaide guztiak zuzendariaren lagunak dira, eta ongi pasatzea dute helburu. Hogei urtez kantuan aritu ondoren, maila bikaina eta nazioarteko ospea lortu dituzte.

Urriak 31, 20:00. Portland State University Chamber Choir (AEB). Loiolako Jesusen Bihotza elizan.

1975ean sortu zuten eta nazioartean lehian aritu da ordutik. 2013an, Gorizian, Seghizzi Koru Kantuen Nazioarteko Txapelketan aritu zen; bertan, 15 sari jasotzeaz gain, lehiaketaren Sari Nagusia irabazi zuen lehen talde amerikarra bihurtu zen.

Azaroak 1, 20:30. Syc Chamber Choir (Singapur). Groseko Mariaren Bihotza elizan.

1964an sortu zuen kantuzale talde batek, eta ordutik mundu guztian saritu dute. Eskolako abesbatza bezala hasi zen, Hezkuntza Musikaleko Ministerioaren Sailaren pean.

Azaroak 2, 19:00. Luar (Letonia). Ibaetako Espiritu Santuaren parrokian.

Jazeps Vitols Letoniako Musika Akademiako Musika Hezkuntza Saileko ahots-taldea da, 2009an sortua. Gaur egun, zazpi abeslarik osatzen dute. Taldearen izenak, Luar, ilargi-argi esan nahi du galizieraz. Izan ere, ilargi-argia bezain ederra eta misteriotsua den musika egitea da taldearen helburua.

Azaroak 3, 20:00. Maska Youth Choir (Letonia). Amarako Santuaren parrokian.

Berezko xarma, estiloa eta musikaltasuna elkartzen ditu Maska Youth Choirek. Janis Ozils izan zen taldearen sortzailea, 2000. urtean. Itxura gaztekoa ez ezik, helburu eta etorkizun handikoa ere izan da.