Medhin eta Saina izan dira azkarrenak Donostiako 60. Nazioarteko Krosean
Afrikarrek euren nagusitasuna erakutsi dute Donostiako Hipodromoan jokatutako lehian.
Teklemariam Medhin izan da Donostiako 60. Nazioarteko Kroseko txapelduna. Eritrearra azkarrena izan zen atzo goizean Donostiako Hipodromoan jokatutako lehian, eta hala, txapela jantzi zuen, 2009an eta 2011n egin zuen moduan. Guztira, 30 minutu eta 32 segundoko denbora behar izan zuen Medhinek ibilbidea osatzeko; Toroitich 10 segundo beranduago iritsi zen, Cheboik osatu zuen podiuma, 40 segundora. Betsy Sainak lortu zuen garaipena emakumezkoetan, Magdelene Masairen aurretik, 23:18:09ko denborarekin.
Hasierako kilometroetan lehen postuengatik borroka gogorra erakutsi zuten partaide azkarrenek. Ivan Fernandezek aurrea hartu zuen eta lasterketaren buruan jarri zen, laugarren kilometrora arte. Ondoren, Medhin, Toroitich eta Cheboi afrikarrek eta Javi Guerrak gasteiztarra harrapatu zuten, lasterketaren buruan boskotea osatuz. Ondoren, zenbait gora-behera izan ziren. Zortzigarren kilometrora iritsi baino lehen, Medhinek atzean utzi zuen Toroitich ugandarra, eta bakarrik jarraitu zuen aurrera. Javi Guerra iritsi izan zen laugarren, eta Ivan Fernandez euskalduna izan zen bosgarrena.
Emakumezkoetan, Keniako bi korrikalari izan ziren nagusi, Saina eta Masai, aurreikuspenek zioten moduan, eta laugarren kilometroan euren jarraitzaileak atzean utzi zituzten. Lehenengo kilometroetan, Veronica Perez, Lidia Rodriguez, Diana Martin eta Gema Barrachinak soilik lortu zuten afrikarren erritmoa jarraitzea. Maite Maiora izan zen helmugan lehen euskalduna (25:24), zazpigarren postuan, Ibone Sanchezen aurretik.
Fernando Osa gogoan
Duela gutxi hil zen Fernando Osa mendizaleari ere omenaldia egin zioten Vasco de Camping elkarteko kideek. Lehen aldiz, 1 zenbakidun dortsala bere omenerako erreserbatu zuten, Herrikoia Krosera lasterketan. Gipuzkoako plazatik hipodromorainoko lasterketan 140 korrikalarik parte hartu zuten.
Gizonezkoen podiuma. (Argazkia: Fly Group)
Emakumezkoen podiuma. (Argazkia: Fly Group)
