Zuhaizti danborrada berria batuko da aurtengo sansebastianetara
San Sebastian eguneko ordezkariak udaletxean izan dira. (Argazkia: Ane Urrutikoetxea)
Aurtengo haur danborradako ordezkariak udaletxean izan dira, eta bertan ongi etorria egin die Donostiako alkate Juan Karlos Izagirrek eta Euskararen ordezkari Nerea Txapartegik. Donostiako ereserkia abestuz sartu dira udaletxean, eta bertan beren burua aurkeztu dute Arantzazuko Ama ikastolako Danbor Nagusi Oihane Boladok eta La Anunciata ikastolako General Julen Sananok eta Easo Eder Olatz Cortesek. Ondoren, Boladok San Sebastian eguneko hainbat martxa zuzendu ditu.
Aurten bi abesti berri gehitu direla adierazi du Txapartegik, Azarolaren Hau dek hau eta Sarriegiren Gau ibilera izenekoak. Horrekin batera, Kondarra danborrada mixto bihurtzeagatik zoriondu du: “Geroz eta gehiago dira emakumeak biltzen dituzten danborradak, eta guztiei zorionak eman nahi diegu. Baina parekidetasuna ez da hor amaitzen, eta emakumeek aginte eta erabaki postuak betetzeko deia egiten dugu”.
Alkateak donostiar guztiei “ondo pasatzeko” deia egin die, San Sebastian eguna “herrikoia, integratzailea, parekidea eta magikoa” dela adieraziz. Horrekin batera, haur danborradako ordezkariei zuzendu zaie alkatea, egun horretan herritarren “enbaxadore” direla gogoratuz: “Zuek biziko duzue unerik berezi eta magikoena, bizitzan behin gertatzen diren horietakoa”. Azkenik, denei festaz 24 orduz gozatzera animatu die alkateak.
