Axier Jaka. (Argazkia: Donostiako Udala)
Euskal Herrian hidrokarburoak bilatzeko saiakera asko egon dira petrolio konpainien aldetik, baina momentuz arrakasta eskasa izan dute. Halere, gasa metodo berrien bidez bilatzeko dagoen modu berri baten ondorioz, Euskal Herria lehentasunezko eremua bihurtu da berriro eta
fracking-aren aurkako taldeak beldur dira.
Orain arte teknika hauek erabili diren zonaldeetan hainbat arazo sortu dira: edateko uraren kutsadura, airearen kutsadura, mugimendu sismikoen agerpena, lurraren okupazio altua eta honen hondatzea edota putzuen inguruan bizi diren biztanleengan osasun arazoak, besteak beste.
Donostian oraindik baimenik ez dagoen arren, Fracking Ez Taldearen eskaera teknika hori ekiditea da. Era berean, Gipuzkoako hiriburua den heinean,
fracking-ak eragiten dien udalerriekiko elkartasuna adierazi nahi diete.
Hortaz, teknika hau sortzen ari den arazoen aurrean, Ingurumen zinegotzi Axier Jakak Bilduk bere erabilera galarazteko mozioarekin bat egin duela adierazi du. Honela, Fracking Ez Taldeak egindako proposamena eztabaidatua eta onartua izateko hilabete honetan egingo duten udalbatzarrean aurkeztuko du:
- Donostiako Udalbatzak Donostiako udalerrian Hidrocarburos de Euskadi enpresa publikoak edo beste edozeinek eskatu ditzakeen ikerketa eta ustiaketa baimenak bertan behera uztea eskatzen du.
- Donostiako Udalbatzak Donostiako Udal Gobernuari eskatzen dio fracking-aren aurkako jarrera aktiboa har dezala, Donostia “Fracking gabeko Udalerri” izendatuz eta hori adierazten duen seinalea udalerriaren sarreran jarriz.
- Fracking-ak dituen ondorio lazgarriak herritarrei jakinaraztea.
