Natura eta kultura, bat eginda

Hainbat eragile publiko eta pribatuk bat egin dute, Gipuzkoara hurbiltzen diren turistentzako erakargarri berri bat osatuz: Donostiatik Pasaiarako oinezko bidea, Ulian barrena, bost museo ezagutzeko aukerarekin.

Estitxu Zabala

Ulia

2015/10/01

Donostiatik Pasaiara Ulian barrena joateko ibilbidea erraza da. (Argazkia: Vasco de Camping)

Bertakoen artean ibilbide aski ezaguna izan daiteke Donostia eta Pasaia batzen dituena, Ulian barrena, edo ez. Oraindik bide aberats hori ezagutzen ez dutenentzat, bertakoak zein kanpokoak izan, turismo aukera berri bat zabaldu dute hainbat eragilek: Donostia-Ulia-Pasaia, Bi badien arteko ibilaldia. Itsasertzeko museoen eta portuen arteko ibilbidea. Hain zuzen ere, izen horrekin, eskuorri turistiko berri bat osatu dute elkarlanean, honakoek: Donostia Turismoa, Oarsoaldea Garapen Agentzia, Gipuzkoako Foru Aldundia, eta bost museo. Izan ere, Donostia eta Pasaia ibilbidean zehar kokatzen diren museoen eskaintza sartu dute ibilbidearen baitan: Aquariuma, Ontzi Museoa eta San Telmo Museoa Donostian, eta Albaola eta Victor Hugo Etxea Pasaian. Hala, Gipuzkoa urtero bisitatzen duten milaka eta milaka turistek denbora luzeago gelditzeko aitzakia izango dela uste dute. Eskuorrian, ibilbide, datu eta geltoki zehatzak jarri dituzte, hainbat informazio osagarrirekin batera: museoen eskaintza, bidean ikus daitekeena… Ia zortzi kilometro dituen ibilbidea da eskaintzakoa, eta Bidartetik Donostiaraino doan Talaia bidearen zati bat da. Beraz, Paisaia ederrak ikusteko aukera izango dute bisitariek, txango erraza egiten duten bitartean: Amildegiak, Kutrallako gaina, Atalaundi, Mendiola, La Platako itsasargia, ura hirira eramateko XIX. mendean eraikitako akueduktua… Azken batean, natura eta kultura uztartzen dituen ibilbidea dela nabarmendu dute eskuorriaren bultzatzaileek.

Elkarlanerako bide

Albaolako Raul Perezek Pasaiako museoen izenean hitz egin zuen, eskuorriaren aurkezpenean, eta elkarlana nabarmendu zuen. Perezen esanetan, elkarlan esparru horretan, itsas ondarearekin eta itsas kulturarekin loturiko ekimen gehiago garatzea da euren asmoa, aliantzak, sinergiak eta anbizio handiagoko elkarlanak sendotuz. Donostiako zein Pasaiako ordezkariak, gainera, pozik daude itsasoarekin lotutako eskaintza berria dela eta. Hala, Sergio Ekiza Pasaiako Udaleko zinegotziak proposamenak Pasaiara turismoa erakartzeko balioko duela uste du; Manu Narvaez Donostia Turismoaren zuzendariaren ustez, berriz, Donostiaren turismo eskaintza osatzen lagunduko du. Eskuorri berria hainbat gunetan egongo da eskuragai: Victor Hugo Etxea, Albaola, Aquariuma, Ontzi Museoa, San Telmo Museoa, Donostia eta Pasaiako turismo bulegoak eta Gipuzkoako Foru Aldundian. Museoak

Aquarium Donostia -Herria. Donostia, kaia. -Deskribapena. Aquariumak bi solairu ditu 1928an eraikitako egoitza entzutetsuaren barnean, Gipuzkoako itsas ondareari eta itsasketari eskainiak. Guztira 200 arrain espezie baino gehiago biltzen ditu, eta espezie tropikal ugari. Ehunka arrainez inguratuta sentitzeko aukera ematen du 360ºko ikuspegia eskaintzen duen tunelak. -Ordutegia. Uztaila eta abuztuan egunero zabalik: 10:00-21:00. Aste Santutik ekainaren 30era eta irailean, lanegunetan: 10:00-20:00, eta asteburu eta jai egunetan: 10:00-21:00. -Sarrera. 13 euro (helduak), 6’50 (4-12 urte artekoak), doan (4 urtetik beherakoak), 9 euro (pentsiodunak, ikasleak eta langabeak), 38 euro (familia ugariak).
Ontzi Museoa -Herria. Donostia, kaia. -Deskribapena. Garai batean Kotsultorearen Dorretxe izandako eraikinean dago, XVIII. mendean portuko jarduerak kontrolatzen zituzten bertatik. Euskal Herriko itsas ondarea eta historia jorratzen ditu. -Ordutegia. Asteartetik larunbatera: 10:00–14:00/16:00-19:00; igande eta jai egunetan: 11:00-14:00. -Sarrera. 3 euro (arrunta), 2 euro (bost lagun edo gehiagoko taldeak), 1’50 euro (ikasleak, familia ugariak eta 65 urtetik gorakoak).
San Telmo Museoa -Herria. Donostia, Parte Zaharra. -Deskribapena. Urgull mendiaren magalean dago, eta Euskal Herriko museorik zaharrena da, 1902an inauguratu zuten (antzinako domingotar komentua). Berritze arkitektoniko baten ondoren, 2011n zabaldu zituen berriro ere ateak. Museoaren bilduma aberatsa da eta euskal gizartearen bizitza eta garapena agertzen ditu. -Ordutegia. Asteartetik igandera: 10:00-20:00. -Sarrera. 6 euro (arrunta), 3 euro (ikasleak, 65 urtetik gorakoak, familia ugariak…), doan (asteartero).
Albaola -Herria. Pasaia San Pedro. -Deskribapena. Pasaiako badiaren sarreran dago, Uliaren ekialdeko aldean. Itsas faktoria hau, museo bizi bat da. Izan ere, bertan, XVI. mendeko San Juan baleontziaren erreplika bat osatzen ari dira, eta bisitariek lanean ikus ditzakete langileak, teknika zaharrak erabiliz. Portu horretan bertan eraiki zuten jatorrizko ontzia, 1563an, eta hortik bi urtera itsasoratu zuten, baleak ehizatzeko. Ternuako kostaldean ondoratu zen. -Ordutegia. Aste Santutik iraila arte: 10:00-14:00/15:00-19:00; urritik Aste Santura: 10:00-14:00/15:00-18:00. -Sarrera. 7 euro (arrunta), 5 euro (ikasleak, familia ugariak, erromesak, langabeak eta 65 urtetik gorakoak).
Victor Hugo Etxea -Herria. Pasai Donibane. -Deskribapena. XVII. mendeko Pasaiako etxe tipikoa. Bertan Victor Hugo bizi izan zen, 1843ko udan, eta Miserableak eleberria idatzi zuen. Victor Hugo, oroimenera bidaia erakusketaren bidez, merezitako omenaldia eskaini nahi diote idazle ezagunak utzitako marrazki eta idazkien testigantza-multzo baliotsuari. -Ordutegia. Aste Santua, uztaila eta abuztuan: 9:00-14:00/16:00-19:00. Gainerako datetan, asteartetik larunbatera: 10:00-14:00/16:00-18:00, igandeetan: 10:00-14:00. -Sarrera. Doakoa.