Ia laurehun arraunlarik bat egin dute Benta Berriko kiroldegian

Donostiako XVII. Indoor Herri Estropada antolatu du Vermont ergometro markak.

Estitxu Zabala

2015/11/16

Urkiko Koxme Burutaran kadeteak zilarrezko domina lortu zuen. (Argazkia: Ur-Kirolak)

Aurreko urteetan egin duen moduan, Vermont ergometro markak Donostiako XVII. Indoor Herri Estropada egin zuen joan den larunbatean, Benta Berriko kiroldegian. Aurtengo lehian, ia 400 arraunlarik bat egin dute kiroldegiko pistan. Adinaren eta mailaren arabera, 2 minutu, 1.000 metro edo 2.000 metroko probak egin behar izan zituzten. Tartean aritu ziren Ur-Kirolak zein Donostia Arraun Lagunak klubetako kideak. Hala, Urkiko Koxme Burutaran kadeteak eta haur mailako Arene Lacostek zilarrezko domina bana lortu zuten; Arraun Lagunakeko Katya Arratibel, berriz, hirugarrena izan zen 17-18 urtekoen artean, eta bere atzetik geratu zen Sonia Bartolome. Lehiaren inguruko argazki bilduma bat osatu du Urkik.

Ur-Kirolak saritu dute

Ur-Kirolak saritu berri dute. Zehazki, 2015eko Elkarte Onenari Saria jaso du klubak, Espainiako Arraun Federazioaren eskutik. Kluba oso pozik agertu da jasotako sariagatik, eta sare sozialen bidez zoriondu ditu elkartea osatzen duten kide guztiak: zuzendaritza, bazkideak, gurasoak, babesleak, laguntzaileak… “Ur-Kirolak denak garelako”.