Parisko erasoak gaitzesteko bilkura jendetsua egin dute Alderdi Ederren

Agurtzane Altuna

2015/11/16

Parisko erasoak gaitzesteko elkarretaratzea, Alderdi Ederren. (Argazkia: Agurtzane Altuna)

Ostiralean Parisen gertatutako erasoak gaitzesteko hainbat bilkura egin dituzte eguerdian; udaletxearen aurrealdean, horietako bat. Alderdi Eder jendez bete da 12:00etarako minutu batzuk falta zirenean. Udal talde guztietako ordezkariak eta dozenaka herritar elkartu dira, eta bost minutuko bilkura isila egin dute. Bukaerako txalo zaparradak hautsi du isiltasuna, eta herritar batzuk kandelak eta lore sorta bat ere jarri dituzte elkartasun keinu gisa. Bestalde, Donostiako Udalak erakunde adierazpen bat argitaratu du, Pariseko erasoak arbuiatuz.

Udalaren erakunde adierazpena:

1.- Udalak Eraso horiek erabat gaitzesten ditu. Biktima errugabeak modu koldarrean erailtzeak, herritarren artean beldurra eta sufrimendua zabalduz, ez da inoiz onargarria izango. Ez dago ideia, injustizia edo aldarririk mota honetako hilketak azaldu ditzakeenik.

2.- Donostiako hiriaren izenean, gure samina eta elkartasuna helarazi nahi dizkiogu Pariseko herriari eta biktimen senitartekoei Pariseko Alkatetzaren bitartez. 3.- Herritarren askatasunean dago oinarrituta Europako gizartea, eta balio horiek zapuztu eta birrindu nahi dituzte hilketa horien atzean dauden buru eta taldeek. Pertsona guztien askatasuna, eta sinisteko edota era ezberdinean pentsatzeko duten eskubidea aldarrikatu behar dugu. 4.- Pariseko hilketa koldarrak salatzeko, bat egingo dugu erakundeetatik deitzen diren ekimenetan parte hartuz.