Alaia Martin zuzenean sailkatu da Illunbeko finalerako

Gipuzkoako Bertsolari Txapelketako lehen finalaurrekoa irabazi du Zarautzen.

Irutxuloko Hitza

2015/11/23

Alaia Martin oiartzuarra. (Argazkia: Bertsozale.eus)

Alaia Martin oiartzuarra nagusitu da Gipuzkoako Bertsolari Txapelketako lehen finalaurrekoan, 504 punturekin, eta abenduaren 19an Illunben jokatuko den finalerako txartela lortu du. Agin Laburuk (496) eta Ander Lizarraldek (455,5) egin dute bigarren eta hirugarren, hurrenez hurren. Lehen bi sailkatuen eta gainontzekoen artean alde handia izan da. Unai Gaztelumendi añorgatarra azken postuan geratu da 441 punturekin, eta datozen bi igandeetako finalaurrekoetan ezusteko handirik ez bada, finaletik kanpo geratuko da. 1.200 bertsozalek bete zuten atzo arratsaldean Zarauzko Aritzbatalde kiroldegia, eta gogoz txalotu zuten sei bertsolarien jarduna. Datorren igandean Tolosan jokatuko da bigarren finalaurrekoa, Usabal kiroldegian (17:30). Beñat Gaztelumendi añorgatarrak, Beñat Lizaso, Iñaki Apalategi, Nerea Elustondo, Oihana Iguaran eta Unai Agirre bertsolariekin kantatuko du. Sarrerak Bertsosarrerak.eus webgunean eskura daitezke.

BERTSOLARIA	PUNTUAZIOA
Alaia Martin Etxebeste	504
Agin Laburu Rezola	496
Ander Lizarralde Jimeno	455,5
Jon Martin Etxebeste	451
Beñat Iguaran Amondarain	445
Unai Gaztelumendi Arandia	441