Metroaren eraikuntza proiektuko azterketa lanak egiten hasi direla salatu dute
Horren berri gaur goizean izan du Satorralaia bizilagunen mugimenduak, eta horregatik elkarretaratzea egin dute Zaragoza plazan.
Metroaren igarobidearen eraikuntza proiektuak idazteko azterketa lan geoteknikoak egiten hasi direla salatu du Metroaren aurkako Satorralaia bizilagunen mugimenduak. Metroaren egitasmoko ibilbidearen inguruan (Lugaritz-Mirakontxa zein Mirakontxa-Easo zatietan) lursail publiko nahiz pribatuetara sartuko direla adierazi du taldeak, eta “prospekzio geologikoak egiteko okupatuko” dituztela. Horregatik, elkarretaratzea egin dute Zaragoza plazan, makina bat lanean ari den lekuan.
Lan horiei buruzko informazioa eskatu zioten udalari abendu amaieran, baina erantzunik ez dutela jaso azaldu dute, “hirian metroa erakitzeko egitasmo hori gelditzea eskatzeko eginiko 400 alegazioek erantzunik jaso ez zuten bezalaxe”. Hortaz, “inposaketa hori modu baketsuan saiheste aldera mugitzera goaz”, eta ondorengoa proposatu dute:
1. Jende guztiari dei egin diote, Metroaren proiektuaren ibilbidean nahiz bere inguru hurbilean gisa honetako azterketa lanik egiten ari dela ikusiz gero, horren berri bizilagunen mugimenduari emateko.
2. Prospekzio geologiko horiek eta bestelako azterketa lanak egiteko, Metroaren egitasmoko ibilbidearen gainean dauden lursailetara sartu eta aldi baterako okupatu beharko dituztela adierazi dute, “beren tresneria eta makinariarekin. Lursail pribatuen kasuan, jabeek enpresari lursailera sartzeko baimena ez emateko eskubide osoa dutela jakinarazten dugu, hain zuzen ere Metroa sustazten duen Administrazioak lursail horiek aldi baterako okupatzeko legezko espedientea burutzen ez duen bitartean (kasu honetan, Eusko Jaurlaritzako Ingurumen eta Lurralde Antolaketa Saila da Administrazio eskuduna)”. Horrenbestez, legeak eskatzen duen baldintza administratibo hori bete ezean, enpresari lursailera sartzeko baimenik ez ematea proposatu diete jabeei, nahiz eta enpresako langileek akordio batera iristea proposatu ere.
