Parkinsonaren ikerketaren aldeko ongintza ekitaldi bat antolatu du Aspargik

Kursaalen egingo dute, apirilaren 13an, 20:00etan, elkartea zein gaitza ezagutzera emateko.

Lide Ferreira

2016/04/05

Carmen Olazabal, Pascal Gaigne eta Gurutz Linazasoro. (Argazkia: Lide Ferreira)

Parkinson gaitzaren munduko egunaren harira –apirilak 11–, Aspargik urtero jardueraren bat antolatzen du, gaitza eta elkartea erakustarazteko. Aurten harago joan nahi dute, eta erronka berri bat finkatu dute. Izan ere, apirilaren 13an Parkinsonaren ikerketaren aldeko ongintza ekitaldi bat egingo dute lehenengoz. Hala, bertan jasotzen duten dirua gaitza ikertzeko bideratuko dute, aurrerago deituko duten beka baten bitartez. Ekitaldia Kursaalen izango da, kubo txikian, 20:00etan, eta musika izango da nagusi. Ongintza ekitaldian eskuzabalki musikari zein artista ugarik hartuko dute parte. Tartean, Iñaki Salvador eta Pascal Gaigne pianistak, Bisuteria Orkestra, Ritxi Salaberria baxua, Iñaki Diegez eta Aitor Furundarena soinu-jotzaileak, Aiert Beobide dantzaria, Zo Zongo batukada, eta Amaia Zubiria eta Ainara Ortega abeslariak. Olatz Beobide aktoreak eta Asier Hernandezek aurkezpen lanak egingo dituzte. Orotara, ordu eta erdiko ekitaldia izango da. Sartzeko 19 euro ordaindu beharko dira, eta bildutako diru hori gaitza ikertzeko proiektu bati emango diote. Hain justu, bigarren urtea da beka bat eskaintzen dutela. Modu horretan, eta behin ekitaldia igarotzen denean, proiektuak aurkezteko epea zabalduko dute. Iaz 6.000 euro bildu zituzten, eta irabazleari eman zizkioten proiektua gara zezan.

2000. urtetik lanean

Aspargi elkartea duela hamasei urte jaio zen, Parkinson gaitza zuten pertsonak eta senideak biltzeko eta euren bizitza kalitatea hobetzeko asmoz. Egun, egitarau zabala dute, eta hemezortzi jarduera eskaintzen dituzte, informaziotik hasita formakuntzaraino. Elkartearen arabera, Gipuzkoan 1.500 eta 2.000 lagun inguruk dute gaitza, eta horietatik 600 Aspargiko kideak dira.

Azken bideoak