Ekainaren 18an manifestazioa egingo dute Metroaren proiektua gelditzeko eskatzeko

Datozen hilabeteotan Satorralaiak hainbat jarduera antolatu ditu; asteleheneko batzar irekian azalduko ditu guztiak.

Lide Ferreira

2016/04/15

Metroaren aurkako manifestazioa Loiola kalean. (Argazkia: Nerea Lizarralde)

Metroaren aurkako beste manifestazio bat, Loiola kalean. (Argazkia: Nerea Lizarralde)

Satorralaiak bizilagunen batzar irekia egingo du astelehenean, apirilak 18, 19:00etan, Amarako eskoletan (sarrera, Larramendi kaletik). Helburua da Metroaren proiektua gelditzeko eskatzeko datozen hilabeteotan egingo dituzten jardueren berri ematea, eztabaidatzea eta abian jartzea. Era berean, proposamenak egiteko eta trukatzeko aukera egongo da. Aurreratu dutenez, Satorralaiaren ekimenez ondorengoak egingo dituzte: sinadura bilketa bat, banderaxkak jarri balkoietan, manifestu bat, Kontxako hondartzan jarduera informatibo bat, eta manifestazioa ekainaren 18an, besteak beste.

Sinadura bilketen kanpaina abiatuko dute aurki, hiru eskari nagusiekin: Donostian Metroaren igarobidearen proiektua gelditzea; Eusko Jaurlaritzari Donostiak behar duen garraio ereduaren inguruan erabaki prozesu parte hartzaile bat irekitzea; eta Gipuzkoako Foru Aldundiari herri galdeketa bat egitea, “eraikuntza lanak finantzatzeko diru laguntzak emateko asmoa duenez, horren inguruan herritarrek duten iritzia ezagutzeko”.
Bestalde, Metroari Stop lelopean banderaxkak egingo dituzte, balkoietan jartzeko. Momentuz, 500 banderaxka banatuko dituzte.
Gainera, arlo ezberdinetako pertsona ezagunen atxikimenduak biltzeko, manifestu bat idatzi dute.
Maiatzeko udalbatzarrean Metroaren gaia eztabaidatuko da. Horregatik, herritarren presentzia eskatu dute Satorralaiatik.
Maiatza amaiera edo ekaina hasieran, berriz, Kontxako hondartzan jarduera informatibo ikusgarri bat egitea proposatu dute, salaketa kutsu batekin.
Azkenik, ekainaren 18an, manifestazioa egingo dute; eta handik egun gutxira, bildutako sinaduren entrega.