Mendiaren inguruko pelikulek beteko dute Antzoki Zaharra

Mendi Tour jaialdiak ekarriko ditu Bilbao Mendi Film Festivaleko lanik onenak.

Estitxu Zabala

2016/05/09

Mendi Tour jaialdia iritsiko da laster hirira, Vasco de Camping mendi elkartearen eta Donostia Kulturaren eskutik. Bilbao Mendi Film Festivaleko lanik onenak eskainiko dituzte, maiatzaren 10ean, 11n eta 12an, Antzoki Zaharrean. Egun bakoitzerako sarrerak 6 euroko prezioa izango du. Bilbao Mendi Film Festivalean saritutako zenbait film labur ikusteko aukera egongo da; bi egunetarako proiekzioak eta hitzaldi bat antolatu dituzte. Tartean izango dira Jurek (Alpinismoko Film Onena) eta Jeff Lowe’s Metanoia (Ikuslearen Saria). PROGRAMAZIOA

Asteartea, maiatzak 10 (19:00).

– Urzulo (Xanti Ugarte; EH, 2015); Bilbao Mendi Film Festivaleko Euskarazko Film Onena. Aloña Mendi Espeleologia Taldeak bukatutzat emandako kobazuloak berriz esploratuko ditu. Horien artean, Urzulok eman zuen ustekaberik handiena. Sifoi txiki bat zeharkatu ondoren, kobak aurrera egiten du eta esplorazioaren erronkari aurre egin behar diote espeleologoek. Lorpen eta porroten istorioa. – High and Mighty (Nick Rosen; AEB, 2015); Bilbao Mendi Film Festivaleko Film Labur Onena. Highball bat eskalatzea ez da jende ahularentzat. Modalitate abangoardista honi zailtasun maila igotzen badiogu, kontrola zeharo galdu daiteke. Daniel Woods-en borroka epikoa agertzen du. – Jurek (Pawel Wysoczanski; Polonia, 2015); Bilbao Mendi Film Festivaleko Alpinismoko Film Onena (BMFF 2015) Pawel Wysoczanski-ren dokumentala. Jurek Kukuzkaren bizitza erakusten du, bai literalki bai metaforikoki ere. Oinetako garbitzailea izatetik aberatsa bilakatzera igaroko da, langile sozialista izatetik hedabideen izarra bihurtzera, dirurik eta baliabiderik gabe mendia igotzen hastetik Himalaiako koroa lortzen lehena izateko lehian egotera.

Asteazkena, maiatzak 11 (19:00)

– Hitzaldia. Krzysztof Wielicki: Poloniaren neguko himalayismoa

Osteguna, maiatzak 12 (19:00)

– Prohibido escalar (Daniel Castillo; Espainia, 2015) Eskalatzaileek euren buruari egin behar dizkioten galdera garrantzitsuenak planteatzen ditu. Gogoetarako, elkarrizketarako eta konpromisorako gonbidapen bat da, geroz eta leku gehiagotan debekatzen ari baitira eskalatzea. – A Line Across the Sky (Joss Lowell; AEB, 2015); Bilbao Mendi Film Festivaleko Eskaladako Film Onena (BMFF 2015) Fitz Royren zeharbidea bilatuenetarikoa da gaur egungo alpinismoan: zazpi gailur eta 4.000 metroko eskalada bertikala ditu. Nork imajinatu zezakeen hain dibertigarria izan zitekeela? – Jeff Lowe’s Metanoia (Jim Aikman; AEB, 2014). Bilbao Mendi Film Festivaleko Ikuslearen Saria. Jim Aikmanek Jeff Lowe alpinista ezagunaren bizitza kontatzen du. Bere igoera utopikoekin eta kirol honen gailurrean izatearekin hasita, mendiko bakarkako eskalada ausartena eragin zuen gainbeheratik igaroz, gaur egun pairatzen duen endekapenezko gaixotasunera heldu arte. Inoiz bizi izan duen abentura handienerako prestatu zuen.