Munduko gatazkak izan dituzte hizpide Mintzodromoan

Bagera Euskaltzaleen Elkarteak antolatu du, San Telmo Museoan; bi txandatan banatu dira partaideak.

Lide Ferreira

2016/05/26

Talde bat, hitz egiten, San Telmo Museoko ekitaldi aretoan. (Argazkia: Lide Ferreira)

Ohiturari jarraituz, San Telmo Museoak ateak zabaldu dizkio gaur Mintzodromoari. Bi txandatan banatuta, hizketan aritu dira euskaldun zahar zein euskaldun berriak. Lauko lagunen taldetxietan jarrita, munduko gatazkak gaia izan dute hizpide. Hala, 15 minutuko txandak egin dituzte, eta hiru azpigai jorratzeko aukera izan dute.

Nilo erakusketan, Samuel Aranda argazkilariak XXI.mendeko egiptorarren eguneroko bizimodua eta errepresioa erakusten du, mendebaldeko gizarteak ikusi nahi ez duen errealitatea erakustarazi nahian. Zer dakigu mundu osoko botereen arteko gatazka handi bat omen den errealitateaz?
Hondar artean aldi bateko erakusketa berezia da. Sahararren jaima bat da, emakumeek tindatutako oihalez egina, eta barruan hainbat jarduera gauzatzen dira. Bizimodua, ohiturak, kultura erabat desberdinak izan arren, Euskal Herrian bereziki garrantzitsua da sahararrekiko elkartasuna. Zergatik?
Apirila eta maiatza artean, Donostia Kulturako hainbat langilek errefuxiatuentzako oinetakoen bilketa antolatu zuten. Kultura eta konpromiso soziala nahasi behar dira? Non daude bi jarreren arteko mugak?

Jarduera Bagera elkartea, Donostiako Udaleko Euskara Zerbitzua eta Donostiako euskaltegien arteko elkarlanaren emaitza da. Helburua da euskara ikasten ari dena euskaraz hitz egitera animatzera; hizkuntza jakin arren, euskaraz aritzeko aukera gutxi dituenari aukera horiek ematea; nahiz eta euskalduna izan, ohituraz, euskaraz gutxi egiten duenari motibazioa areagotzea, eta abar. Azken batean, euskara eta euskaraz partekatzea nahi da.