Intxaurrondoko erromeria Uliako parkean egingo dute aurten

Lide Ferreira

2016/06/02

Beste urte bateko erromeria bat, Mendiola baserrian. (Argazkia: Intxaurrondo Zaharreko Jai Batzordea)

Artzak Ortzeok elkartea hasi zen Intxaurrondo Zaharreko erromeria antolatzen, 1978an. Mendiola baserriko beheko zelaian egiten zuten, Herri Ametsa ikastolatik oso gertu. Urte batzuetan zehar, ez zen erromeriarik antolatu, Zulo Zahar elkarteak berreskuratu zuen arte. Garai hartan, presoentzako dirua biltzea zen helburua. 2001etik hona, ordea, Intxaurrondo Zaharreko Jai Batzordeak hartu du ardura, eta urtero, ekaina hasieran, Mendiola baserrian antolatu izan du, auzo giroa sortzeko eta jaietarako dirua lortzeko xedearekin. Aurten, baina, bilgune berria izango dute urteroko erromerian parte hartu nahi dutenek. Izan ere, Uliako mintegietan egingo dute aurtengo ekitaldia, “parkea bultzatzeko eta elkartasuna adierazteko asmoz”. Uliako parkean hirigintza proiektu bat aurrera eraman nahi dute, gazteentzako 70 apartamendu eraikitzea, hain zuzen ere. Halere, bizilagunak ez daude erabakiarekin konforme: “Eraikitzen hasten badira, parkea suntsituko dute”, esaten zuten uliatarrek. Intxaurrondoko jai batzordearen arabera, “azkenean, Ulia ondoan dugu, eta Intxaurrondoko jende asko bertan bizi edo bizitakoa da. Horregatik, gure babesa adierazi nahi diegu”.

Parte hartzailea

Intxaurrrondo Zaharrekoentzako egun berezia da erromeriarena: “Jendea biltzeko eta giro onean ondo pasatzeko aukera paregabea izaten da”, azaldu dute jai batzordetik. Abestu, musean jolastu, dantzatu, jolastu… denetarik aurkituko dute erromeriara hurbiltzen diren heldu, haur zein gaztetxoek. Gainera, parte hartzeari garrantzi handia ematen diote antolatzaileek: “Azkeneko urtetan jendearen partaidetza handia nabaritu dugu bazkaria prestatzerako orduan. Guk material guztia ematen diegu, eta bakoitzak egiten du bere paella. Jendea bikoteka edo banaka ibiltzen da”. Horretaz gain, postre txapelketa ere egiten dute, eta bertan edozeinek hartu dezake parte. Momentuan erromerian daudenekin epamahai bat osatzen dute, eta horrela erabakitzen dituzte irabazleak. Mendiola baserrian egin izan dutenean, baserri mundua erakutsi izan diete haurrei, animaliak eta ingurunea ezagutu dezaten. Aurten, berriz, umeentzako tailer berezi bat eskainiko dute: “Uliako parkera ume gehiago hurbilduko direla uste dugu. Normalean, jolasak auzokoen artean prestatzen ditugu. Baina aurten jende gehiago etortzea espero dugunez, zerbait berezia antolatu nahi izan dugu”. Hala, jai batzordearekin harremanetan jarri zen mutil batek eskainiko du Peliñeko tailerra, Goma Eva materialarekin panpinak egiteko. Euria eginez gero, Uliako mintegietan dagoen gune estali batean egingo dituzte jarduerak. ULIAKO HAZTEGIKO ERROMERIA: EKAINAK 4, LARUNBATA

11:00etan, Gunearen irekiera: musika eta pintxo beroak (odolki, txorizo eta txanpiak).
Eguerdian, bazkaria: txorizo egosia, auzotarrek egindako paellak, txapelketako postreak eta kafea. Edaria barne. 10 euro. Bazkarirako txartelak Zulo Zahar, Erdikoa edo Leku Ederren eskuratu daitezke.
16:00etan mus txapelketa. Ondoren: umeentzako Peliñeko tailerra; eta, arratsaldean zehar, toka txapelketa.