"Ikastetxeetara heldutako baliabideek ez dute bat egiten bizi dugun errealitatearekin"

Donostiako eskola publikoetako irakasleek salatu dute Hezkuntza sailak erabakitako lanpostuen eskasia.

Estitxu Zabala

2016/06/13

Donostiako ikastetxe publikoetako irakasleen agerraldia.

Bat egin dute Donostiako ikastetxe publikoetako irakasleek, Hezkuntza sailak esleitu dituen giza baliabideen zerrendaren hutsuneak salatzeko. Azken batean, erakunde publikoek irakaskuntza publikoa benetan zaintzea eskatu dute. Horretarako, Koldo Mitxelena Kulturunean emandako prentsaurrekoan hala adierazi dute: “Jendarteari adierazi nahi dizkiogu gure ikastetxeetan sortu diren egoerak, kezkak eta zailtasunak, 2016-2017 ikasturteko beharrei aurre egiteko”. Eskola publikoak dituen erronkak handiak direla diote, eta saiatu arren, ezinezkoa zaiela erronka horiei modu egokian aurre egitea: “Ikastetxeetara heldutako baliabideek ez dute bat egiten bizi dugun errealitatearekin”. Zailtasunak zerrendatu dituzte, zertaz ari diren ulertzeko:

DIGITALIZAZIOA. Hezkuntza Sailak digitalizazioa sartzera bultzatu gaitu, bai kudeaketa mailan, bai ikasleen hezkuntza lanetan. Baina helburu hau lortzeko baliabideak behar ditugu bai pertsonalak, baita, ekonomikoak ere. Hori betetzeko, ardura hori beteko duen lanpostua izendatzea eskatzen dute: LH 3. zikloko ordenagailu eta arbelen jarraipena eta konponketa bideratzeko, ordenagailu gelen jarraipena eta programen txertaketa egiteko, Berritzegunetako mintegietan parte hartzeko…
ANIZTASUNA. Talde egonkorrak nahi dituzte ikastetxeetan, era guztietako aniztasunei erantzuteko eta premia bereziei aurre egiteko: HPBko ikasleak, E.A.E.ra ikasle etorri berriak … Kudeaketa horretan ere murrizketak topatu dituzte diote. ?Hezkuntza laguntzarako espezialisten beharra azpimarratu dute.
ADMINISTRAZIOA. Kudeaketa administratiborako langileak nahi dituzte. Ekonomia kudeaketa osoa administrariak balira bezala egitea eskatzen dietela diote. Aplikazio itxiak erabili behar dituztenez, sarri ezinezkoa izaten zaie datuen inportazioa egitea, eta hainbat eta hainbat datu bi edo hiru aldiz eskuz idatzi behar izaten dituzte. Arazoa konpontzeko, ?administratiboak nahi dituzte HH eta LHko zentroetan.
LIBURUTEGIAK. ACEX programaren bidez, zituzten giza baliabideak erdira kendu dizkietela diote, eta datorren ikasturterako, berriz, desagertu egingo dela toki gehienetan. “Zer gertatuko da eskola liburutegiekin eta horietan burutzen den lanarekin? Inork pentsa dezake giza baliabiderik gabe martxan jarraituko dutela bere gisa?”.

Sinatzaileak:

Aiete Ikastetxea
Aitor Ikastola
Altza herri ikastetxea
AmaraBerri
Amassorrain Ikastola
Arantzazuko Ama Ikastola
Astigarragako Herri Eskola
Katalin Erauso
Herrera Ikastetxea
Ibai Ikastola
Igeldo Herri Eskola
Ikasbide Ikastola
Intxaurrondo Hegoa
Intxaurrondo Ikastola
Jakintza Ikastola
Lauaizeta Ikastola
Mendiola
Orixe Ikastola
Zuhaizti
Zubieta