Hogeitabosgarrenez egingo dituzte Astronomia jardunaldiak

Aranzadi Zientzia Elkarteak antolatuta, gaur hasiko dira, Koldo Mitxelenan; haurrentzako tailer bat ere antolatu dute larunbaterako.

Lide Ferreira

2016/10/04

Aranzadi-Astronomia jardunaldiakAranzadi-Astronomia jardunaldiak

Koldo Mitxelenan aurkeztu zituzten jardunaldiak. (Argazkia: Aranzadi)

Astronomia jardunaldien XXV. edizioa egingo dute aurten, gaur (urriak 4), bihar (urriak 5) eta larunbatean (urriak 8), 19:00etan. Urteurrena baliatuko dute astronomiak berak ikerketa garaikidean duen lekua nabarmentzeko. Izan ere, Aranzadikoek azaldu dute energia handien fisika zein kosmologia fisikoan oraindik ere konpondu gabe dauden arazo nagusien lanketa esparruetako bat dira azken belaunaldiko behatokietatik egiten diren behaketa astronomikoak. Jardunaldien bitartez, Aranzadi Zientzia Elkarteko Astronomia Sailak oinarrizko bi funtzio ditu: alde batetik, Gipuzkoako astronomoentzako topagune bihurtzea (euren esperientziak partekatu eta emaitzak aurkez ditzakete bertan); eta, bestetik, espazioko zientzien hedapena bultzatzea behaketa publikoen eta prestakuntza hitzaldien bidez.

Bi ikerlarien lana

Oraingoan, Donostia inguruan astronomiarekiko interesa duten pertsona guztiei bi ikerlarik egindako lana gerturatuko diete. Partikulen fisikan eta behaketako kosmologian Europa mailako ikerketa-zentroetan egiten dute lan biek. Mikrokosmosa eta makrokosmosa elkarri lotuta dauden zientziari buruzko beren ekarpenen eta etorkizuneko aurreikuspenen berri emango dute. Bestalde, hitzaldien gain, urriaren 8an, larunbata, 11:00etan, gaztetxoentzako astronomia tailerra antolatu dute Aranzadiko egoitzan, Zorroagagainan (Donostia). Praktika horren baitan, erradiazio kosmikoaren detektagailua eraikiko dute. Jarraian, kanpoko espaziotik iritsitako partikula azpiatomikoek uzten dituzten aztarnei behatu ahal izango dituzte. Aztarnaren itxuraren arabera, oinarrizko partikula ugariak bereizten ere ikasiko dute. Oskarbi badago, Astronomia Sailaren eguzki-tresnak erabiliko dituzte Eguzkiaren jarduerari behatzeko; hain zuzen ere, horixe da gure planetara iristen den erradiazio-iturri nagusietako bat. Tailerran parte hartzeko ostirala arte, urriaren 7ra arte, 943466142 zenbakira deituta izena eman daiteke. Gomendatutako adina 12 urtetik gorakoa da, plaza mugatuak daude eta salneurria 10 eurokoa da. XXV. ASTRONOMIA JARDUNALDIAK

Urriak 4, asteartea, 19:00etan. LHCk sortu al dezake materia iluna? Oinarrizko partikulak eta mikro eta makro kosmosen arteko muga. Hizlaria: Rebeca Gonzalez Suarez. Koldo Mitxelena.
Urriak 5, asteazkena, 19:00etan. Planck misioa: unibertso goiztiarrari begirada bat, mikrohuinen hondo kosmikoaren radiazioaren bidez. Hizlaria: Marcos Lopez-Caniego. Koldo Mitxelena.
Urriak 8, osteguna, 11:00etan. Gaztetxoentzako astronomia tailerra. Aranzadiko egoitzan (Zorrozagaina).