150 parte hartzaile baino gehiago, Uliako lehen ezkutaketa txapelketan

Udazken festaren barruan antolatu dute jarduera; haur zein helduek egunaz gozatzeko aukera izan dute.

Lide Ferreira

2016/10/31

Udazken festa, Ulian. (Argazkia: Uliako Lore Baratzak)

Uliako Lore Baratzak-en ekimenez, ezkutaketa txapelketa egin dute lehen aldiz Uliako parkean, atzo antolatu zuten udazken festaren barruan. Aurretik izena emateko aukera zegoen arren, unean bertan jende andana hurbildu zen bertara. Orotara, 62 bikotek (heldu eta haur bana, gehienetan) hartu zuten parte; 150 lagun inguru. Txingurri txistalaria, Lorealai bikotea, Taipan sugeak, Txantxangorriak… talde ugari elkartu ziren, eta hiru txandatan jolastu behar izan zuten. Txanda bakoitzean sariak ere banatu zituzten, eta hamaika talde izan ziren zorionekoak. Hain zuzen ere, ezkutaleku originalenak saritu zituzten antolatzaileek: “Inoiz imajinatuko ez genuen tokietan aurkitu genituen batzuk! Bizilagunen auzoko konposta gunean, aita eta seme bana zuhaitz batean igota…”. Irabazleek parkeko baratzeko kalabazak eta Tamayo dendako erosketa txartel batzuk eraman zituzten opari. Ezkutaketa txapelketaz gain, hainbat musika emanaldi egon ziren ikusgai –bolero doinuak barne–, eta udazkeneko landaketak ere egin zituzten erdiko negutegian. Gainera, haurrentzako marrazketa tailerrak ere arrakasta handia izan zuen.