Donostiako Libre-Eleak mugimenduaren agerraldia. (Argazkia: Malen Aldalur)
Duela urte eta erdi onartu zituzten Mozal Legeak: Herritarren Segurtasunerako Legea eta Kode Penalaren erreforma. Donostian, gutxienez, 22 dira Mozal Legearen aplikazioagatik zigortuak edo isunak ordaindu dituztenak; guztira 9.000 eurotik gora jarri dituzte. Egoerari aurre egiteko bi bide aurkeztu ditu Eleak-Libre mugimenduak: batetik, edalontzi solidarioak salduko ditu hiru euroan San Tomas egunean eta, bestetik, udalean mozio berri bat aurkeztuko dute.
Uste dute mozal Legeak protestak zigortzeko helburuarekin formulatutako neurriak direla: “Pobrezia eta ezegonkortasun egoerak zigortuko dituzte”. Izan ere, Eleak-Libre mugimenduak uste du edozein herritar bihurtuko dela susmagarri, delitua gertatu beharrik gabe: “Ez dira gertakariak soilik kriminalizatuko, zenbait giza talde kriminalizatuko dira; migratzaileak, aktibistak edo baliabiderik gabeko pertsonak”. Argi dute Herritarren Segurtasunerako Legea eta Kode Penalaren erreforma onartzen badituzte, herritarrak “koxka bat” estuago egongo direla: “Horregatik, inoiz baino antolatuago eta kalean egoten ahalegindu behar dugu”.
Erakundeak ere aurka
Herritarrak bakarrik ez, hainbat erakunde ere lege hauen aurka azaldu dira. Nazio Batuen Erakundeak uste du “norbanakoen oinarrizko askatasunaren aurkako mehatxuak direla”. Euskal Herrira etorrita, Gasteizko parlamentuak ere aurkakotasuna adierazi zuen eta legea “errefusatu” zuen. Bestalde, azaldu dute Gipuzkoako Batzar Nagusiek Mozal Legeak arbuiatu zituztela.
Udalean aurkeztutako mozioarekin Donostiako Udalak bide berbera hartzea nahi dute; San Tomas egunean salduko dituzten edalontziekin, berriz, orain arteko isunak ordaindu nahi dituzte.
Hori dela eta, dei egin dute “beldurra galdu eta neurri bidegabe hauen aurrean modu irekian desobeditzera”.
Xabier Soto, isuna jaso duen kide bat: “Beharrezkoa da udala Mozal Legeen aurka egotea eta aurka egitea”
Zein da zure egoera?
Ekainaren 19an Gipuzkoa Zutik mugimenduaren kanpaldira sartu ziren Ertzainak eta kazetari bat gertakaria grabatzen ari zen. Identifikatu egin nahi zuten eta ni identifikazioa eragozteko asmoz hurbildu nintzen. Ertzainek jipoitu egin gintuzten, eta salaketa jarri genuen. Lau hilabeteren ondoren, 900 euroko isuna iritsi zaigu.
Zergatik?
Ertzainari jotzen ahalegindu nintzela jartzen zuen gutunean eta ihes egin nuela, ez identifikatzeko. Noski, dena gezurra da. Errekurtsoa aurkeztu dugu isunen aurka eta onartu digute; ea orain zer gertatzen den.
Mozio bat aurkeztuko duzue udalean. Zer lortu nahi duzue?
Beharrezkoa da Donostiako Udalak Mozal Legeen aurka egotea eta aurka egitea. Gipuzkoako Batzar Nagusiak eta legebiltzarra, gutxienez, aurka azaldu dira. Dena den, ez da nahikoa aurka daudela esatea.
