Miren Arzalluz izango da Etxepare Euskal Institutuko zuzendaria

Estitxu Zabala

2017/01/02

Miren Arzalluz. (Argazkia: Quintas Fotógrafos)

Etxepare Euskal Institutuak badu zuzendari berria: Miren Arzalluz. Duela gutxi zabaldu du albistea Institutuak berak; horrela, lekukoa hartuko dio Aizpea Goenagari, eta euskara eta euskal kultura munduratzeko lanean. Deustuko Unibertsitatean Historian Lizentziaduna da Arzalluz, Politika Konparatuan Masterra egin zuen London School of Economics-en, eta Artearen Historiako Masterra The Courtauld Institute of Art-en. Victoria & Albert Museum-etik eta Kensingtoneko Royal Ceremonial Dress Collection-etik pasa ostean, museoen arloan egin du ibilbidea Arzalluzek, moda erakusketa komisario gisa, eta kontserbatzaile lanetan. Cristobal Balenciaga Museoko kontserbatzaile eta bildumen arduradun izan da, baita Eusko Ikaskuntzaren Bizkaiako ekintzen programazioaren arduraduna ere.

Goenaga, sei urtez

Etxepare Institutua martxan jarri eta sei urtez zuzendari izan da Aizpea Goenaga. Bukatu berri den urtearen abenduaren 23an, ordea, Etxepare Institutuan ez zuela jarraituko adierazi zuen: “Urtea bukatzearekin batera, 2010ean Etxepare Euskal Institutuaren zuzendari bezala hasi nuen bidaia amaitu egingo da. Euskara eta euskal kultura munduan barrena zabaltzea erronka apasionantea izan da, eta esker oneko hitzak besterik ez ditut bidelagun izan zareten guztiontzat; bai sortzaile, eragile eta erakundeentzat. Aurrerantzean ere bide batean baino gehiagotan topo egingo dugulakoan nago”.