GuraSOSek ptrentsaurrekoa eman du gaur goizean. (Argazkia: Lide Ferreira)
Pasa den abenduaren 27an, espero zenaren kontra, epaitegiak ez zuen erabakirik hartu Gipuzkoako Hondakinen Kudeaketaren (GHK) bileraren aurretik, eta hark lanak adjudikatu zituen. Izan ere, Donostiako Administrazioarekiko Auzietarako 3. Epaitegiak erabaki behar zuen Zubietako planta eraikitzeko lanen adjudikazio prozesua geldiarazi edo ez. Bada, sortutako egoeraren eta erraustegiaren bideragarritasun legal eta ekonomikoaren “premiazko” azterketa bat egin du GuraSOSek. Joxe Mari Izeta elkarteko lehendakariak eta Joseba Belaustegi GuraSOSeko kide eta abokatuak gaur bertan aurkeztu dute komunikabideen aurrean, eta dossierra eragile zein herritarren artean banatzeko asmoa du. Ostiralean erreportaje zabala eta GuraSOSen balorazioa argitaratuko du IRUTXULOKO HITZAk, Izetarekin hitz egin baitu.
Izetak azaldu duenez, txostenaren ondorio nagusia da erraustegiaren proiektua “bideraezina” dela eta ez dela gauzatuko. Ikerketa horren harira, bi albiste nagusi eman dituzte. Alde batetik, abenduaren 27an ez zela adjudikaziorik egin esan dute: “Aurretiazko beste izapide bat da joan den astean egindakoa, eta lizitazioaren sailkapenean lehenbiziko postuan dagoen enpresak oraindik agiriak aurkeztu beharko lituzke. Atzo goizean GuraSOS GHKren egoitzara joan zen, eta konprobatu zuen adjudikazioaren dekretua ez dela jaulki”.
Donostiakoari dagokio erabakia hartzea
Bestetik, Donostiako Administrazioarekiko Auzietarako epaitegiaren berririk gabe jarraitzen du GuraSOSek. 3. aretoari eskatua dio ebazteko aldundiak derrigorrezkoa duela erraustegiari buruz prozesu parte-hartzaile bat bideratzea, eta, hori egin bitartean, adjudikazio prozesua gelditu beharko luke aretoak. Erantzunik ez zuela ikusita, EAEko Auzitegi Nagusira joa zuen GuraSOSek, baina auzitegi horrek asteartean erantzun zion Donostiakoari dagokiola erabakia hartzea. Auzitegietako iturriek berriki jakinarazi dutenez, urtarrila amaieran edo otsaila hasieran emango hartuko dute erabaki hori.
Belaustegiren arabera, erabaki dute erraustegia egin behar dutela, eta ez zaie inporta ez herritarren ez eta auzitegien iritzia ere: “Arduratsu jokatu eta proiektua geratu beharko lukete lehenbailehen, ahalik eta kalte gutxien sortzeko. Guk beti egingo dugu adostasuna eta elkarrizketaren alde”.
