Musika eta dantza eskolan izena emateko epea ireki dute

Maiatzaren 19ra arte zabalik egongo da aurretiko izena emateko aukera.

Lide Ferreira

2017/04/27

Udal Musika eta Dantza Eskola, inaugurazioa

Dantza klasikoko goi mailako ikasleak. (Argazkia: Estitxu Zabala)

Gaurtik hasita eta maiatzaren 19ra bitarte, irekita egongo da aurretiko izena emateko epea, eta Atotxako Musika eta Dantza Eskolaren Administrazioan zein www.donostiaeskola.eus webgunean egin ahal izango da. Aurten 2017-2021 Plan Estrategikoa onartu dutenez, hainbat berrikuntzarekin dator matrikulazio kanpaina. Besteak beste, unibertsitate ikasleentzako talde instrumental berriak egongo dira: hariak eta haizeak. Gainera, Entzunaldi Aktiboa izeneko irakasgai berria eskainiko dute, Atotxako egoitza nagusian, hiriko kultur agendan oinarrituta.

Beste auzoetara zabalduko dituzte

Bestalde, 1. mailako eskolak (3-7 urte) hiriko beste auzo batzuetara zabalduko dira: Bidebieta, Martutene, Amara (Larramendi), Amara (Olaeta), Loiolako Erribera eta Aiete (Arostegi). Musika eta Mugimendua ere eskainiko dute 3 urteko haurrentzat. Donostiako Udalaren Musika eta Dantza eskolaren helburua da ikasleengan piztea ahots, tresna eta dantza taldeetan parte hartzeko interesa. Gainera, estilo guztietako kontzertu eta dantza ikuskizunetara joateko zaletasuna bultzatzen dute, eta adin guztietako ikasleek hartu dezakete parte.