2006tik 2012ra bitartean jaiotako haur donostiarrek hartu dezakete parte.
Oporretan Euskaraz udalekuetako artxiboko irudi bat. (Argazkia: Lide Ferreira)
Donostiako Udaleko Euskara Zerbitzuak urtero uztailean antolatzen dituen Oporretan Euskaraz udaleku irekietan parte hartzeko
maiatzaren 8tik 12ra arte izena eman ahal izango da. Internet bidez egin daiteke
www.donostiaeuskaraz.eus edo
www.donostia.eus webguneetan, edo Udaleko Euskara Zerbitzuaren bulegoan (Konstituzio plaza, 2 – 9:00etik-15:30era).
2017ko udaleku irekietan
2006tik 2012ra bitartean (bi urte hauek barne)
jaiotako haur donostiarrek har dezakete parte. Taldeak, gehienez ere, hamabi haurrez osatutakoak izaten dira eta hizkuntza ereduaren, jaiotze urtearen eta jasotze puntuaren arabera eratzen dira. Izena eman duten haur guztien zerrenda maiatzaren 15an argitaratuko dute, lehen aipatutako webguneetan. Zozketa maiatzaren 17an egingo dute eta emaitzak egun berean, arratsaldez, jarriko dituzte.
Udalekuak uztailean zehar egiten dira, astelehenetik ostiralera, 09:30etik 13:30era. Astean behin, egun osoko irteera izaten dute haurrek, 09:30etik 17:00etara, haur hezkuntzakoek izan ezik. Mota guztietako jarduerak egiten dituzte: hondartzara joaten dira, hiriko parke eta lorategietan jolasak egiten dituzte, euria egiten duenean eskola edo haur txokoetako gelak erabiltzen dituzte jolas, tailer eta txapelketak egiteko, ingurugiroa lantzen dute…
Guraso bakarreko familiak, kuota murriztua
Hilabete osoko kuota arrunta 157,69 eurokoa da, eta aurten lehen aldiz, guraso bakarreko familiek kuotaren % 75a ordainduko dute, 118,26 euro; guraso bakar batek (familia Liburuan guraso bakar bat agertzen denean edo gurasoa alarguna denean soilik) eta seme-alaba batek edo gehiagok osatutako familia unitatea, baldin eta bere 2015eko diru-sarrerak 22.701 € baino gutxiago direnean (lanbide arteko gutxieneko soldata 2,5 aldiz baino txikiagoa).
Orain arte egin diren gainerako murrizketek ere bere horretan jarraitzen dute: familia ugariek % 75a ordainduko dute, 118,26 €, familia ugari bereziek kuotaren %50a, 78,84 €; eta gizarte-laguntza jasotzen duten familiek kuotaren % 10a, 15,76 €. Prezio horretan garraioa eta materiala barne daude.
