Metroaren igarobidea eta hiri eredua izango dituzte hizpide maiatzaren 24an

Donostiarrei maiatzaren 25eko udalbatzarrera joateko deia egin die Satorralaiak.

Lide Ferreira

2017/05/15

Satorralaiako kide batzuk, Amarako EuskoTren geltokiaren aurrean. (Argazkia: Satorralaia)

Satorralaia bizilagunen mugimenduak salatu du Metroaren igarobidea modu “inposatzailean eta inolako parte hartze sozialik gabe” egiten ari dela. Larunbatean Satorralaiako hainbat kidek elkarretaratzea egin zuten, Amarako EuskoTren geltokiaren aurrean, metroaren lanen esleipena gaitzesteko. “Onartezina iruditzen zaigu metroaren igarobideak, hirian sortzen duen desadostasun zabalari erantzungor eginez, Eusko Jaurlaritzak aurrera jarraitzea. Hiriarentzat ez da beharrezkoa eta kaltegarria da; horregatik, eztabaida sustatzen jarraituko dugu“, esan dute Satorralaiakoek.

Hitzaldia eta udalbatzarra

Horren harira, maiatzaren 24an eta 25ean bi hitzordu finkatu dituzte. Maiatzaren 24an, Metroaren pasantea eta hiri eredua Donostian izenburupean, mahai inguru bat egingo dute 19:00etan, Koldo Mitxelenan. Parte hartuko dute: Andeka Larreak (hiri eraldaleta prozesuen ikertzailea), Andoni Egiak (geografoa eta Tokiko Garapen agentea) eta Koldo Telleriak (Hirigintza irakaslea Arkitektura fakultatean). Maiatzaren 25ean, berriz, Donostiako udalbatzarrera joateko deia egin du Satorralaiak, “metroaren proiektuarekiko arbuio soziala adierazteko”.