Haurren minbiziaz naturaltasun osoz hitz egitea nahi dute

II. Markel Txapeldun Memoriala egingo dute maiatzaren 28an, Altzako Arriberri plazan; irabazi guztiak Aspanogi elkartearentzako izango dira.

Lide Ferreira

Altza

2017/05/23

Markel Txapeldun Memorialaren antolatzaileetako batzuk, Altzako haurraren gurasoekin. (Argazkia: Lide Ferreira)

Lau urte betetzear zela, minbiziaren ondorioz zendu zen Altzako Markel Jimenez. Iaz, bere omenez egin zuten lehen aldiz Markel Txapeldun Memoriala, eta 3.000 lagun baino gehiagok hartu zuten parte. Aurten, haur minbiziaren aurka borrokatzen duten haur guztien eta haien familien aldeko ekitaldia egingo dute. Bildutako diru guztia Aspanogi elkartearentzako izango da. Memoriala igandean ospatuko dute, 11:00etatik 19:00etara, Altzako Arriberri plazan (Casares kultur etxearen aurrean). Horren harira, Markelen gurasoekin –Adrian Jimenez eta Veronica Paredes– eta hasieratik dena antolatzen lagundu dieten bi auzotarrekin –Gabriel Vieiro eta Veronica Paredes– egon da IRUTXULOKO HITZA. Memoriala mugimendu sozial bat bilakatu dela adierazi dute, eta Altza osoaren babesa jaso dutela nabarmendu ere bai: “Iaz, kamisetak saldu genituen. Baina, aurten, banderak ere jarri ditugu salgai, eta auzoa laranja kolorez tindatu da erabat. Oso pozik gaude gaixotasuna ezagutzera ematen ari garelako eta heriotzaren tabuak hautsi nahi ditugulako”. Ostiralean egongo da erreportajea irakurgai. II. MARKEL TXAPELDUN MEMORIALA – Maiatzak 28, igandea

11:00. Pailazoak. Kiki, Koko, Moko. Katapuntxispun. Musika, buruhandiak, kamisetak eta banderak, puzgarriak, haur jolasak, ziba txapelketa, lasterketa-autoen erakustaldia, narrastien erakustaldia.
12:00. Zumba solidarioa.
13:00. Minimoto DMT-en gidatze erakustaldia.
15:45. Hegazti harraparien ikuskizuna eta erakustaldia.
16:00. Ongietorria eta oroimenaren aurkezpena, Markelen ama eta aitaren eskutik.
17:00. Haur lasterketak. Puzgarriak, shiatsu masajeak, musika.
17:30. Haur tailerrak eta aurpegi margotzeak, horma solidarioa (mezuak ume gaixoei eta bere familientzat).
17:30. Minimoto DMT-en gidatze erakustaldia.
18:30. Herri krosa: 6,7 kilometro. Izen ematea herrikrosa.eus webgunean.
19:00. Sari banaketa eta Gipuzkoako haur minbizia duten ume eta beren familien aldeko omenaldia. Ondoren, agurra eta talde argazkia.