'Handia' filmak Zinemaldiko Epaimahaiaren Sari Berezia jaso du
James Francoren 'The Disaster Artist' pelikulak jaso du Urrezko Maskorra
65. Donostiako Zinemaldiaren sariak banatu dituzte bart gauean Kursaalean. Handia filmak Epaimahaiaren Sari Berezia irabazi du. Jon Garaño donostiarrak eta Aitor Arregik zuzenduriko pelikula ez da esku hutsik geratu. Are gehiago, Zinemira saileko Irizar saria ere jaso du Altzoko erraldoiari buruzko filmak.
Urrezko Maskorra, berriz, James Francoren The Disaster Artist pelikulak irabazi du. Zuzendari Onenaren Zilarrezko Maskorra, berriz, Anahi Berneri argentinarrak jaso du Alanis filmari esker. Emakume Aktore Onenaren Zilarrezko Maskorra ere Alanis filmeko aktore nagusiak jaso du; Sofía Gala Castiglione aktoreak. Gizonezko Aktore Onenaren saria, aldiz, Bogdan Dumitrache aktoreak irabazi du Pororoca pelikulan egindako lanarengatik.
Handia filmeko Aitor Arregi eta Jon Garaño zuzendariei elkarrizketa, Zurriolako butaka saioan.
