EAJk eta PSEk Orixe ikastolari "adarra jo" diotela salatu du EH Bilduk

Malen Aldalur

2017/10/05

Santa Teresa komentua. (Argazkia: Agurtzane Altuna)

Gipuzkoako Foru Aldundiak Santa Teresa komentuarentzat beste proiektu berri bat iragarri du aste honetan. Zalaparta sortu du horrek. Izan ere, Santa Teresa eraikina Orixe ikastolak dituen beharrak asetzeko erabiltzeko nahia erakutsi zuen orain gutxi udal gobernuak. Udaran etorri zen lehen ezustekoa, izan ere, udalak eta Gipuzkoako Foru Aldundiak komentua Barrabes enpresak kudeatuko zuela iragarri zuen. Dena den, Ernesto Gascok azken udalbatzarrean egindako adierazpenen ondoren, Orixeri lehentasuna emango zitzaiola zirudien. Astelehenean, aldiz, aldundiak Santa Teresa eraikina Euskadiko Arkitektura Garaikideari eskaini zion.

“Bigarren aldiz oso aste gutxietan, EAJk eta PSEk Donostiako udalbatzari adarra jo diote, eta horrekin batera Donostia osoari eta, bereziki, Parte Zaharra auzoari, dituen zerbitzu premia larriak asetzea beste behin bigarren mailan geratu direlako”, salatu du Naiara Sampedro EH Bilduko zinegotziak.

Uste dute Zuloaga eta Urgull eraikinak txikiak geratu direla, baina ez dela hori bakarrik: “Espazio faltak zerbitzuaren kalitatean eragina zuzena du, liburutegia edo gimnasio falta izatea, adibidez. Hori gutxi balitz, datorren ikasturtean jantoki zerbitzuak ezingo dio eskaerari erantzun eta orain artekoak baino neurri zorrotzagoak hartu beharko dira. Eta zentzu berean azpimarratu behar da, hemendik bi ikasturtetara, haur kopuruen ratioen araua hautsi egingo dela”.