Jardunaldiaren irudi bat. (Argazkia: CEBANC)
Turismo Eskuragarria negozio-aukera bezala izeneko
jardunaldia egin dute, Donostiako
CEBANCeko egoitzan. CEBANC-CDEA formazio zentroak, Errotu enpresak (inguru terapeutiko pertsonalizatuen diseinurako arkitektura) eta Hotel Advisor Consulting-ek (hotelen kudeaketa, aholkularitza eta komertzializazioa) parte hartu dute bertan. Asmoa izan da
Growmat Growing the market in accesible tourism (2016-2019) Europako proiektuaren praktika onak plazaratzea. CEBANC da Growmat egitasmoaren partaideetako bat, Ingalaterra, Eslovenia, Belgika, Finlandia eta Greziako beste hainbat formazio zentrorekin batera.
Turismo eskuragarria
turismo inklusibo gisa definitu dute, barne hartzen baititu mugikortasun, entzumen, ikusmen, ulermen edo adimen desgaitasuna duten pertsonak, baina baita desgaitasun psikosozialak eta aldi baterako desgaitasuna dutenak eta adin aurreratuko pertsonak ere. Hala, Growmat egitasmoaren helburua hirukoitza da:
turismo eskuragarriaren formazio jarduerak antolatzea, sasoitik kanpoko turismoa sustatzeko aukera berriak bultzatzea eta kooperazio sareak eratzea hezkuntzaren, negozioaren, GKEen eta enpresa sozialen artean.
Eskuragarritasuna Gipuzkoan
Partaide guztiek azpimarratu dute eskuragarritasunari buruzko Gipuzkoako
egoera nahiko ona dela, beste lurralde batzuekin alderatuz gero, baina oraindik badago non hobetu eta, gainera,
ikusgarritasuna eman behar zaiola esparru honetan egiten den lan guztiari. Hartara, Bask for All-eko Zuriñe de Anzolak ondorengoa adierazi du: “Askotan, Administraziotik aurrerapauso asko ematen dira desgaitasunaren bat dugun pertsonon eguneroko bizitza hobetzeko, baina pertsonak izaten dira elkarri eragiten ez dakitenak behar ezberdinak dituzten pertsonekin”.