Gipuzkoa Basketeko Gabonetako campusa egingo dute abenduaren 26tik 29ra
Izena eman daiteke jada, GBCren webgunearen bitartez; 2006 eta 2009 urteen artean jaiotako neska-mutilek hartu dezakete parte.
Azken urteotako ohiturari jarraiki, Gipuzkoa Basketek, GBC Eskolaren bidez, Gabonetako campusa antolatu du. Abenduaren 26tik 29ra, 2006 eta 2009 urteen artean jaiotako neska-mutilek parte hartu ahal izango dute. Ondo pasatzeaz gain, baloiarekin dituzten gaitasunak hobetzeko aukera izango dute.
Hala, Donostiako Atletikok Bera Beran duen kiroldegian, saskibaloiko goi mailako entrenatzaileen entrenamenduak jaso eta hauek beste jarduera ludikoekin tartekatuko dituzte: Donostiako Aquariumera bisita, Museum Cemento Rezolara, Donostia Arenako instalazio guztietara eta, azkenik, Delteco GBC-ko jokalariak azken entrenamendura hurbilduko dira, gaztetxoekin jolastu eta autografoak sinatzeko. Hori guztia 9.00etatik 14.00etara.
Campusean parte hartu nahi dutenek, izena eman dezakete GBCren webgunean. GBC Eskolako kideek 75 euro ordaindu beharko dituzte; gainontzekoek, berriz, 85 euro. Horretaz gain, campusera batzen den anai-arreba bakoitzak %10eko deskontua izango du. 
