Fideo rossejata, txibia eta otarrainxkekin
Fideo Rossejata,
txibiekin eta otarrainxkekin. (Argazkia: Estitxu Zabala)
OSAGAIAK
- Zirikilote fideoak
- Txibia
- Otarrainxkak
- Baratxuria
- Tomatea
- Gatza
- Oliba olioa
- All i olia egiteko: Baratxuria, oliba olioa eta arraultza
PRESTAKETA
Lehenengo fume salda egin behar da, otarrainxken buruekin eta azalekin. Salda egina dagoenean, erretiratu, eta paella ontzi batean doratu behar dira baratxuri ale bat, eta fideoak.
Paella ontzi horretan gehitu behar da txibia zatitua, tomatea eta gatza. Dena ongi estali behar da fumearekin, eta behin ongi xurgatu duenean, otarrainxkak jarri behar dira gainean, apaintzeko. Bost minutuz utzi behar da lasai, eta, ondoren, jateko moduan geratzen da.
Arantza Mendioroz eta Cesar Barrera. (Argazkia: Estitxu Zabala)
Arantza Mendioroz eta Cesar Barrera, All i oli jatetxeko jabeak
«Calcotsen garaia asko nabaritzen da, jende gehiago etortzen da»
Jatetxe kataluniarra da Martuteneko All i oli. Zazpi urte damatzate jatetxearekin Amarako Arantza Mendioroz eta Tarragonako Cesar Barrera senar-emazteek. Auzoko lanak direla eta, bi urte gogor igaro dituzte, baina orain berriro normaltasunera itzuli dira.
Zein da zuen historia?
Cesar Barrera (C. B.): Arango haranean lan egiten nuen, nire familiaren jatetxean. Han denboraldien arabera lan egiten genuen, eta oso astuna egiten zitzaidan. Arantza ezagutu nuen oporraldi batzuetan, gerora nire emaztea izan dena, eta gurekin lan egitera etorri zen. Zortzi urte egin genituen elkarrekin lanean, eta eskaini nion Donostian jatetxe kataluniar bat irekitzea. Martutenen etxebizitza genuen, eta beti izan nuen gogoa nire kontura jatetxe bat irekitzeko.
Zein ibilbide izan du jatetxeak?
C. B.: Proposamena egin eta urtebetera Donostiara etorri ginen, eta 2011ko martxoaren 30ean ireki genuen jatetxea. Hasieran lan handia izan genuen, gero egonkortu egin zen, eta orain oso pozik gaude. Bi urte oso gogor igaro ditugu zubiaren obrak zirela eta. Dena hautsez betea izan dugu eta udan leihoak itxiak eduki behar genituen. Udaran lan gutxiago egiten dugu, baina turista batzuk azaltzen zaizkigu tarteka, Trip Advisor edo halakoren baten bidez gomendioa ikusita.
Bezeroek zer diote?
C. B.: Kataluniako gastronomia ezagutzen dutenak oso gustura ateratzen dira, eta aurretik ezagutzen ez dutenak harrituak geratzen dira. Astean zehar oso lasai ibiltzen gara, eta bereziki asteburuetan izaten dugu lana.
Zerk izaten du arrakasta gehien?
Arantza Mendioroz (A.M.): Rossejata, egin dugun errezeta, mundu guztiari gustatzen zaio. Denboraldian calcotsak ere arrakasta handia izaten du, urritik apirilera izaten da. Asteko menua 20 euroan dugu, dastatze menu bat dugu 28 euroan, eta calcotsak 35 euroan. Taldeko menuak ere egiten ditugu, beharretara egokituz.
C. B.: Egia esan, calcotsen garaia asko nabaritzen da, jende gehiago etortzen da. Gainontzean, hamabost haragi mota egiten ditugu parrilan, eta barazki asko egiten ditugu txingarretan. Arrozak ere baditugu, besteak beste.
Donostiako zein jatetxe gomendatuko zenukete?
A.M.: Portuetxe erretegia, beti pozik irteten gara hortik; eta Parte Zaharreko Morgan, Narrika kalekoa.
