Ehizarekiko errespetua eskatzeko manifestazioa egingo dute igandean

Iñaki Agirre

2018/04/10

1991an Donostian kontrapasaren alde egindako manifestazioa. (Argazkia: Gipuzkako Ehiza Federazioa)

Gipuzkoako Ehiza Federazioak eta lurraldeko ehiza elkarte desberdinek manifestazio bat antolatu dute iganderako talde animalisten ‘presioa’ eten eta euren aktibitatea errespetatua izan dadila exijitzeko. Euskadin ehiza bai! lelopean irtengo dira kalera eta, besteak beste, Ulian ehizatzeko eskubidea aldarrikatuko dute bertan. Federaziotik azaldu dutenaren arabera, Euskal Herri osoko kolektiboei zabaldu zaie deialdia, eta lurraldeko puntu desberdinetako jendea hurbiltzea espero dute. Momentuz, mobilizazioan parte hartuko dutenentzako doako 20 autobus antolatu dituztela jakinarazi dute antolatzaileek. 27 urte pasa dira ehiztarien kolektiboak antzeko mobilizazio bat antolatu zuen azken alditik. 1991ean izan zen, Donostian kontrapasaren alde egin zuten manifestazio jendetsuarekin. Honakoan, “Euskal Herrian ehizak dituen 50.000 zaleak” deitu ditu mobilizatzera Gipuzkoako Ehiza Federazioak. Manifestazioa 12:00etan abiatuko da Easo plazatik. Egun berean, ehiza federazioak deitutako mobilizazioaren aurkako kontramanifestazioa ere egingo du Askekintza talde antiespezistak, ehizatuak diren animalien bizitzeko eskubidea aldarrikatzeko. Arratsaldean izango da, 17:00etan, Bulebarreko kioskotik abiatuta.

EHIZAREN AURKAKO MANIFESTAZIOA!

Gipuzkoako ehiztariak datorren astean ehizaren defentsan manifestatuko dira Donostian. Honek gure aldetik erantzuna izango du. Beraien zaletasuna animalien heriotza dakarrelako, ehiza injustua delako! pic.twitter.com/sMvTxLk0yP
— Askekintza (@Askekintza) April 5, 2018