Ziklo Indoor saio bat Anoetako belodromoan.
(Argazkia: Karlos Corbella)
Kirol Ekintzak ikastaroetan aurretiko izen-ematea irekiko da gaur, ekainaren 4an. Donostia Kirolaren Kirol Ekintzak 2018/19 Kirol Jardueretako Kanpainak 26.525 plaza eskainiko ditu datorren ikasturterako, 90 kirol ekintza mota baino gehiago eta 1.706 ikastaro (hilekoak, hiruhilekoak eta urtekoak).
Aurretiko izen-emateak 2018ko
ekainaren 4tik 12ra (biak barne) egin ahal izango dira, eta pertsona bakoitzak izen-emate eskaera bakar bat egin ahalko du. Bakoitzean bi aukera jarri ahal izango dira, eta plaza lortzen dutenek, bietako bat bakarrik hartu ahal izango dute; kasu horretan, lehenengo aukera lehenetsiko da.
Izen-emateak interneteko orriaren bidez (www.donostiakirola.eus) egin daitezke, edo zuzenean, Donostia Kirolaren bulegoetan (Anoeta pasealekua, 18), 9:00etatik 14:00etara (larunbata 9 eta igandea 10a izan ezik). Gainera, honako kiroldegietan ere egin ahalko dira:
- Bentaberri, Bidebieta, Intxaurrondo, Etxadi eta Egia* kiroldegietan 10:30etatik 14:00etara eta 16:00etatik 20:00etara.
- Paco Yoldi Igerilekuak kiroldegian 15:00etatik 20:00etara.
- Zuhaizti kiroldegian 9:00etatik 20:00etara.
Ekainaren 18tik 22ra
www.donostiakirola.eus web orrian onartutako behin-behineko eskaerak kontsultatu ahal izango dira. Epe berean erreklamazioak egin ahalko dira, Donostia Kirolaren bulegoetan, eta ezinbestekoa izango da aurretiko izen-emate eskariaren kopia aurkeztea.
Zozketa ekainaren 25ean egingo da. Izen-ematea onartua izan ahal izateko, plaza lortu duten pertsonek ikastaroaren prezioa
uztailaren 19rako ordaindu beharko dute. Epe horren barruan ordaintzen ez bada, eskaera bertan behera geldituko da eta plaza hori itxaron zerrendako hurrengoak beteko du.
Donostiako Udalak bere web orrian adierazi duenez, 2017/18 Kirol Ekintzak Kanpainan 18.000 pertsonek hartu zuten parte, azken urteetako gorako joerari eutsiz. Azpimarratu du, era berean, kanpaina honetan partaideen %70a emakumeak izan direla. Partaidetza handiena bildu duten jarduerak Pilates (2.300 partaide) eta ziklo-indoor (1.870 partaide) izan dira. Adingabekoen kasuan, lehen postuan 3-11 urte bitartekoei zuzendutako igeriketa kokatzen da (3.000 partaide). 65 urtetik gorakoei zuzendutako kirol jardueretan partaidetza 1.800 partaidekoa izan da.
*Ekainaren 11 eta 12an: 10:30-13:00 / 17:00-20:00
