Larratxoko jaien hasiera ospatzeko Holi festa egin dute

Irutxuloko Hitza

2018/06/08

Gogoz hartu zituzten atzo Larratxokoek igandera arte iraungu duten jaiak. Iaz bezala, auzoa kolorez bete zuten jaien lehen egunean, izan ere, jaien hasiera ospatzeko, banderen igoera, jai hasierako traka eta txupina botatzeaz gain, Holi festa ere egin zuten. Indiatik datorren festa eredu gisa hartuz, Larratxoko plaza koloretako hautsez busti zuten txiki, gazte eta helduek. Jaien hasiera ofiziala txupinazoak adierazi bazuen ere, lehenago hasi ziren auzotarrak festa giroan murgiltzen. Eskolako txirrinak asteburuaren hasiera eman ondoren, txokolatada, umeentzako jolasak eta aurpegi margoketa egin zituzten jolastokian. 3×3 futbol txapelketa eta Eriz magoaren emanaldiaz ere gozatu dute Larratxoko gazteenek. Holi festaren bitartez eta plazan egin duten Bollyboodeko emanaldiari esker, Indiako kulturen zati bat ezagutzeko aukera izan zuten Larratxokoek. Jaietako asteburu luzeari hasiera emateko, 2017ko kuadrila onenaren saria banatu zuten, eta aurten, Blusa moreak izan dira irabazleak. Lehen eguna borobiltzeko, erraldoi eta buruhandiak atera ziren auzotik zehar, Arraiketai txarangaren musikak gidatuta, eta helduek ere kirola egiteko aukera izan zuten, eskolako jolastokian egin zuten helduen areto futbol txapelketan. Zezen suzkoaren aurrean korrika bukatu zuten jaien lehen eguna Larratxokoek. Hona hemen gaurko egitaraua: Ostirala, ekainak 8 11:00 Toka, bote eta igela txapelketa eskolako jolastokian. 17:30 Haurrentzako txokolatada plazan, auzoko elkarteek eta Candy gozotegiak egindako bizkotxoekin. 18:00 Haurrentzako Dantzaldia Sukar taldearen eskutik: “Kili kili punk” ikuskizunarekin, plazan. 19:30 XIII. pala txapelketako finalak Imanol Gomez pilotalekuan. 19:45 Erraldoi eta Buruhandiak Amarako dultzaineroekin. 20:30 Zezen suzkoa plazan. 20:45 Sardina eta Saiheski jana plazan. 23:00 Rock Jaialdia eskolako jolastokian: A Jako Pako / Yakovlev 42 / Mil Demonios / Jo ta Tiro. 23:00 DJ Txema Txirritako plazan. 23:30 Helduen Danborrada herrikoia Arraiketai txarangak lagunduta. 23:30 DJ RU plazan.